Prome Ministro gradici tur atleta pa yuda mantene nomber di Aruba na halto

ORANJESTAD (AAN): Diabierna ultimo, Prome Minister Evelyn Wever-Croes a asisti na un di e eventonan mas importante, pa loke ta trata deporte, "Premio Excelencia den Deporte".

Prome Minister a expresa di ta honra di por a comparti un anochi asina special cu cada un di e atletanan, entrenadornan y tur esnan cu ta sostene deporte na Aruba.

   Un total di 29 federacion a manda nomber di nan atletanan cu mas a destaca durante aña 2022, pa un total di 130 nominado. Tambe pa prome biaha a reconoce 27 entrenado pa nan dedicacion y contribucion pa e desaroyo di deporte na Aruba, a rindi homenahe na 10 baluarte deportivo, y 7 atleta olimpico a ricibi un certificado y pin di World Olympians Association pa nan esfuerso haci na promove e balornan olimpico.

   Tambe, Prome Minister a expresa cu deporte ta algo sumamente bunita, y como mama y wela di deportistanan, e ta uni su mes na tur esnan cu ta practica deporte. Deporte ta crea ser humanonan saludabel, ta crea un curpa y mente sano y ta hisa e calidad di bida social, na unda por medio di e deporte ta crea lasonan di amistad fuerte. E "Premio Excelencia den Deporte" ta honra y reconoce atletanan cu a destaca den campeonatonan nacional y internacional, y pa cu esaki, Prome Minister ta gradici cada un di nan pa semper pone e nomber di Aruba, riba un pedestal.

   El a felicita tur e nominadonan, tur e baluartenan, tur e miembronan di OLY. Tambe a expresa gratitud na tur federacion, tur e entrenadonan, pero specialmente tur mayor pa sostene nan yiu cu ta practica deporte. Danki na tur e sacrificio cu boso a haci, awe boso ta wak e frutonan. Ohala esaki, por sigui inspira cada un di boso pa sigui crece, y bay mas leu den e deporte di boso preferencia. Un danki tambe, na tur esnan cu a organiza e evento aki, na e miembronan di ASU, FFD, IBiSA, y specialmente na Lotto pa Deporte, y Stichting Sport Subsidie Aruba cu a haci e evento aki posibel. sin laga afo, mi kier gradici Minister di Deporte Endy Croes, pa su vision, pasion y determinacion pa hiba deporte di Aruba, na e siguiente nivel.