Jonathan Wever ta termina exitosamente e segundo modulo di MEMOS

Avansando cu un proyecto pa aporta na nivel di maneho y planificacion

ORANJESTAD (AAN):  Recientemente Director di Operacion di Comite Olimpico Arubano, Jonathan Wever a logra termina exitosamente e segundo modulo di MEMOS (Executive Masters in Sport Organisation Management) cu a tuma luga na cede di Comite Olimpico Mexicano.

            Durante e modulo aki, a presenta e progreso di e proyecto inicial cu a propone durante e prome modulo november ultimo, unda a duna e conclusionnan cu a sali e encuesta cu a haci ademas di e grupo di discusion cu personanan clave dentro di e mundo di deporte.

             E investigacionnan y e conclusion di esakinan lo ta e base pa e proyecto cu ta elaborando, unda ta busca pa traha un producto pa e federacionnan miembro di COA y demas organisacionnan deportivo pa aporta cu aspectonan di maneho y planificacion.  

            Awo cu e modulo aki tras di lomba, ta sigi traha pa termina e proyecto pa asina presenta e version final na luna di november 2025.