E campeonnan di Aruba SV Britannia lo competi den CFU Club Shield

Torneo na Trinidad & Tobago

ORANJESTAD (AAN): Siman pasa a tuma lugar e trekmento di lot di e torneo di CFU Shield Club cu lo tuma lugar na Trinidad and Tobago di 26 Juli pa 3 Augustus venidero.

    Den e torneo aki e campeonnan di Caribe lo topa otro de dividi den diferente grupo.

   SV Britannia a cai den Grupo B hunto cu team Moca FC (Rep. Dominicana), St. Paul's United Strikers FC (St. Kitts and Nevis), AS Étoile de Matoury (Guyana Frances), Guyana Defence Force (Guyana), y Paradise FC International (Grenada).

   E delegacion di SV Britannia lo ta biahando cu Copa Airlines via di Panama pa asina yega Port of Spain na Trinidad.  CFU Club Shield ta un competencia anual di futbol pa e clubnan cu ta miembro di Caribbean Football Union.

   Directiva di SV Britannia kier a gradici tur instancia, comerciante, Lotto pa Deporte y AVB cu a hasi e biahe aki posibel.  Durante e dianan venidero, DIARIO lo trece mas informacion.