Filomena College Mavo Aruba a cera nan siman di scol cu un tremendo Torneo di Volleyball

ORANJESTAD (AAN): Filomena College Mavo Aruba a clausura nan siman di scol cu un tremendo Torneo di Volleyball

– bao auspicio di Aruba Volleyball Association – entre tur e Klasnan di e Scol unda finalmente e Team di Klas 4D a titula Campeon y e Team di Klas 2A Sub-Campeon.

Pa algun añanan caba, Entrenadornan di Aruba Volleyball Association ta bishita e Scolnan Primario y Secundario di Aruba. Meta di esaki ta pa promove e deporte di Volleyball y pa demostra e habilidadnan tecnico y practico y aplica esakinan pa e alumnonan.

Alabes e intencion ta pa haya mas interes bao di e hobennan di Aruba pa deporte y pa motiva nan pa join un club/organisacion deportivo.

Proyecto Escolar aki tin e proceso unda un Entrenador di Aruba Volleyball Association hunto cu e Docentenan di Educacion Fisica di e scol ta train e studiantenan pa 4/6 siman largo. E Entrenador ta haya e posibilidad di train tur Klasnan y na final e Klasnan ta forma Teamnan pa hunga un Torneo entre e Klasnan di e Scol y saca e Campeon y Sub Campeon di e Scol.

E biaha aki a toca Filomena College Mavo Aruba unda e Entrenador di Aruba Volleyball Association hunto cu e Maestronan di Educacion Fisica di Filomena College a train e alumnonan di diferente Klasnan y e finalnan a tuma lugar ariba canchanan di YMCA na San Nicolas.

Hopi entusiasmo y apoya a reina cerca tur e Maestronan y Alumnonan di Filomena College cu a bini hunto pa aplaudi y anima nan respectivo Teamnan. E ambiente tabata tremendo y sigur e talentonan di volleyball a resalta durante e weganan.

Gradicimento ta bay na Gerencia/Director  y docentenan di Filomena College, na Sr. Percy Phelipa como e Entrenador di Aruba Volleyball Association y na Aruba Sport Unie cu a otorga e bunita medayanan na e alumnonan participante.