Exitoso caredanan di street legal di ‘Barcadera Nights’

ORANJESTAD (AAN): Diasabra atardi por a wak fila di auto, carga cu amantenan di drag,

cu tabata yegando International Raceway Palo Marga, pa asina ta testigo di e actividad di Barcadera Nights cu a wordo organiza door di e Barcadera Nights Foundation.

   Barcadera Knight tin di haber cu loke e fotografo di DIARIO, esta Hubert Tiel tambe tabata forma parti di dje y e tempo tabata conoci como careda di caya, caminda un hende sea ta baha man of ta uza un flash light, pa asina e careda sali. E temponan aya, ta pusta contra otro, sin cu tabatin regla di kico bo ta bin cune, ta careda mester tuma lugar y e tabata un riesgo grandi y pa colmo ilegal.

   Awendia e caredanan di drag a bira mucho mas organiza y ta uza e luznan di Christmas Tree pa coredornan sali pusta contra otro. Sinembargo tin un equipo cu kier mantene e ambiente aki bibo y a organiza Barcadera Nights, caminda e starter tabata uza un flash light pa asina e careda tuma lugar.

   Logico cu ariba Palo Marga ta hopi mas safe pa hasi esaki, compara con unsafe nos tabata haci’e antes riba Barcadera of otro pistanan clandestino cu nos tabata uza. Pa loke ta trata e Barcadera knight, mester bisa, cu esaki a haya hopi bon atencion di e amantenan di drag y tanto tribuna, como pit-area tabata repleto di tanto participante, como fanatico.  Tabatin competencia di ‘Tuner War’, ‘King of the Street Bike’, ‘Fever Show’, ‘2-Stroke vs. 4-Stroke’, ‘Rematch Race’, y tambe ‘Power Wheels Race’.

   E ganador absoluto di Tuner Wars 2022 FWD Edition tabata Chris Halley di DB Tuning.  Den Categoria Auto, prome lugar pa Chris Halley di DB Tuning, y di dos lugar pa Albertico Noguera di Bellos Performance.

   Den Categoria Bike, prome lugar pa Richard Every di Racing P-Nutz, di dos lugar pa Norwin Dania.  Den Categoria Scooters, prome lugar pa Alexei, di dos lugar pa Tejay.  Den Categoria Match Race, prome lugar Euwald Cicilia, y di dos lugar pa Edward J. Croes.  E Ganador di Fever Show tabata Jarsino Bislip.

   Keda pendiente, ya cu bo matutino DIARIO cu ta e unico corant na Aruba cu si ta pine atencion na e deporte aki, ta bay tin mucho mas informacion e siman aki den SPEEDWORLD di tur loke a tuma lugar riba e pista di Palo Marga, durante e caredanan di Barcadera Nights.