Jomark Flanegin ta dal Poy Flanegin homerun pa caba e wega y Royal Power Tat Fat a continua

Yiu ta dal tata Homerun

ORANJESTAD (AAN):  Copa Noord 2025 dedica na Johannes “Poy” Flanegin, Alvaro Barrios, Nel Frank y Francis Arcaya a continua diasabra ultimo riba veld di Kudawecha. Despues cu henter mainta Aruba a haña un palo di awacero y e pregunta cardinal den pueblo tabata ta si weganan ta continua , SV Royal Power cu tin suficiente experencia den situacionnan asina  a manda jama su hungadornan aden mas tempran y a traha pa 4 ora largo hopi duro riba veld cobando diferente canal pa e awa por a sigui su caminda y asina logra cuminsa e promer wega solamente un ora mas laat esta 6pm enbes di 5pm.

            Manera a caba di prepara e veld e muchanan di SV Royal Power a cambia paña  den dugout y a dal nan uniform bisti comokiera cu ta Royal Power mes mester hunga e promer wega contra Super Plus. Tur e weganan di diasabra ta cruse nan eliminatorio pues un pa tera y un pa lama pa mira kendenan lo hunga semi final y final diadomingo 15 di Juni riba dia di Tata.

Super Plus ta inicia e promer inning brabo contra Royal Power y ta zona pitcher habridor Jomark Flaneging basta fuerte remolkando 5 careda pa bay pica bay ariba 5-0. 

            Royal Power no ta baha cabes y ta keda trankilo reacionando den bom di promer inning cu 3 careda pa hasi e wega 5-3. Den bom di dos inning ayuda cu un flyball cu e rightfielder no por a bin kla cune Royal Power ta explota riba Super Plus anotando 10 careda pa bolter e score 13-5 na nan fabor.

            Den cabes di 5 inning Super Plus ta menasa anotando 1 careda. Poy Flanegin ta drenta releva Ray Bernabela y den bom di 5 cu coredor na base yiu homber di Poy Flanegin esta Jomark Flanegin ta tyopa un recta di e Tata y ta duna Feliz dia di Tata cu un cuadrangular hopi leu den deep Centerleft.

            Segun fanaticada pafor di stadion e bala a cay den Ambiente Snack poniendo nos amiga Aping na careda. Royal Power 16 careda, 14 hit, 2 eror y ta laga 3 coredor na base. Super Plus 6 careda, 8 hit, 4 eror y tambe ta laga 3 coredor den circulacion. 

            Jomark Flanegin ta cubri henter e ruta y ta seya e victoria riba su nomber mientras Ray Bernabela ta bay cas cu e derota.

            Mihor bateadornan pa Royal Power a resulta Giandrick Lacle kende su bate tabata na candela di 4-3 incluyendo un bataso di 4 skina pafor di stadion, Edmar “Macho” Tromp di 3-2, Leander Angela di 1-1, y Jomark Flanegin di 4-2 incluyendo un homerun pa caba e wega.

            Pa Super Plus a destaca na bate Shawn Web, Marcel Duran, Jorge Baez tur a bay di 3-2 mientras Eddie Flanegin a bay di 2-1.

             Cu e resultado aki Royal Power a manda Super Plus cas mientras Royal Power a continua pa Semi Final diadomingo vs Stingers.