Dos wega candeloso den e Semifinal di 40 Plus di Fedeveta

ORANJESTAD (AAN): Diasabra cu a pasa, a tuma lugar e semi final playoffnan di Fedeveta 40 plus riba tereno di RCA na Solito.

   Manera menciona, publico tabata en espera di un bon futbol y e prome wega cu tabata e revancha entre Nacional cu Riverplate no a desapunta. E prome mitar  Nacional a ataca via na mediocamponan y a pone e defensa di Riverplate bao un presion immenso y asina nan a comete un foul net pafor di e area penal. Aki hungador Valdo a los un tiro cu a resulta di ta e prome goal.

   Na di 2 mitar nacional a keda pone presion y via un otro tiro liber e mesun hungador Valdo a doble e score na 2-0 na fabor di Nacional. Pero di eynan Riverplate a pone un presion enorme tambe pa empata y por a mira un crecimento grandi den e equipo di Riverplate y asina mediante 2 tiro liber y e ultimo den e ultimo minuutnan a empata e wega. Tabata di lamenta cu despues di wega e mesun hungador Valdo di Nacional a haya un carchi cora di referee pa dissent.

   Segun reglamento di Fedeveta a bay over na tiro penal directo unda Riverplate a gana cu e scsore di 4-3 den penalty.

   Referee Central Jimmy Valderamam cu su assitentenan Rambo Flanegin y Ive Samondjan a traha duro pa tene e wega bon bao control.

   E di 2 semi final a entre Dakota Starsz y Teachers United. Aki Dakota cu a supera den number di hungadornan y experiencia a bay cu un Victoria di 4-0. E prome mitar Dakota a domina pero teachers a purba todo por todo pero e defensa di Dakota tabata hermeticamente cera.

   Referee Central Ive Samoendjan y asistentenan Rambo Flanegin y Ben Lucker a mantene bon control di wega.

   Mester bisa cu e spirito di Fedeveta a reina despues di wega ora cu tur hungador a mezcla cu otro y sigui fiesta e semifinalnan hunto.

   Riba e combinacion di potret por wak e accion di Diasabra pasa