Rumannan Rebecca y Christiaan Jansen a gana medaya di oro den Triathlon na Puerto Rico

ORANJESTAD (AAN):  Rumannan Jansen a biaha siman pasa pa Puerto Rico pa participa na un campamento di desaroyo unda paisnan den nos region a participa.

Durante un siman largo nan a train mainta y atardi.

            Durante e campamento tambe nan a haci test di entre otro natacion, ciclismo y coremento na pia. Mester bisa cu rumannan Jansen a haci nan testnan cu hopi bon resultado.

            Diasabra mainta rumanan Jansen ta forma team cu Costa Rica pa por participa na un careda di Mixed Relay, aki rumannan Jansen ta logra subi podium y yega na di dos lugar patras di Team Colombia.

            Diadomingo madruga e atletanan ta wordo busca pa competi na e careda 2024 World Triathlon Development Regional Cup Puerto Rico. E atletanan a haci un Sprint Triathlon unda nan mester a landa 750 m, bike 20 km y core 5 km na pia.

            Rebecca Jansen ta e prome pa cuminsa, e ta sali na di cuater lugar for di awa pero ta domina riba bais y ta logra drenta prome den transicion, Rebecca ta lidera e careda na pia te na ultimo buelta unda e ta wordo pasa door di atleta di Costa Rica.

            Rebecca ta completa su Sprint Triathlon den 01:09:33 y ta yega segundo lugar den categoria Elite y ta logra tambe un medaya di oro den categoria di Junior.

            E siguiente pa cuminsa ta su ruman Christiaan Jansen, e ta sali di tres lugar for di awa y ta lidera e parti di ciclismo hunto atleta elite di Panama, e atletanan ta traha hunto y ta habri un gap riba e resto di atletanan. Christiaan ta logra termina su careda den un tremendo tempo di 58:57 algun seconde patras di atleta elite di Panama.

            Christiaan tambe ta logra un medaya di oro den e categoria di Junior.

Rebecca y Christiaan kier a gradici Aruba Triathlon Association pa e oportunidad bonita aki. Un danki di curazon na tur persona cu a yuda den e desaroyo di rumannan Jansen.

             E siguiente compromiso internacional lo ta Americas Triathlon Cup and Central America and Caribbean Championships na Punta Cana cu lo tuma lugar na fin di Juni.