Dos hungador di Aruba a sobresali den Campeonato Mundial di Domino na Las Vegas

Delegacion grandi di Aruba ta participando

ORANJESTAD (AAN): Actualmente tin un delegacion di Aruba di domino, representando Aruba Domino Bond, participando na e di 19 Campeonato Mundial di Domino na Las Vegas, Nevada.

   Un delegacion di 28 atleta, kendenan a sa di bataya fuertemente contra mas di 500 hungador representando 14 diferente pais, manera Abkhazia, Russia, Brazil, Merca, Venezuela, Puerto Rico, Republica Dominicana, Ecuador, Panama, Costa Rica, Egipto, Colombia y hopi mas.

   E di 19 Campeonato Mundial di domino a cuminsa dia 22 di October, y a culmina 26 di OCtober.  Den e campeonato aki, organiza pa e Federacion Internacional di Domino (FID), Aruba ta participando pa di 8 aña consecutivo

   ADB tin e placer di anuncia, cu di mas di 500 dominisista, 2 hungador di Aruba a resalta grandemente entre profesionalnan den e deporte mas hunga rond mundo, Domino.

   Ta trata di Jadimir Kwidama, kende ta participando na su di 5 campeonato mundial, a keda na di 23 lugar di Mundo.  E atleta, nobato cu ta haciendo un furror den campeonato nacional di domino Balashi 2023 na Aruba, a demostra cu Aruba tin talento.

   Atleta Lizanne Kelly, a demostra un dominio, y ta finalisa e campeonato Mundial na Las Vegas, como e di 5 mihor di mundo.  Un logro sin igual pa Aruba, entre e grandinan mundialmente.

   ADB ta felicita tanto Lizanne Kelly, como Jadimir Kwidama, pa nan logronan como Nr. 5 di mundo y 23 di mundo respectivamente.

   Tambe ADB kier a gradici y felicita e 28 atletanan cu a representa Aruba dignamente, sin laga afor e ayudo di gobierno di Aruba por medio Minister Endy Croes, Sport Subsidie Aruba, Lotto pa Deporte, Divi Impact Foundation, Primavera Sport Club y tur cu di un of otro forma a coopera cu nos atletanan.

   Tambe, Aruba Domino bond ta sumamente contento y orguyoso, cu e di 20 Campeonato Mundial di Domino, cu lo tuma lugar na September 2024, a worde anuncia y confirma cu esaki lo tuma lugar na nos isla ARUBA.

   Tur esaki posibel danki na esfuerso enorme di Señora Soraida Boekhoudt, Presidente di Aruba Sport Unie (ASU) como tambe Sr. Andy Farro, Presidente di Aruba Domino Bond (ADB) como tambe e directiva di ADB completo.  Pabien Aruba.