Grupo local hopi entusiasma cu Torneo Kingdom Classic Baseball 40+

Den luna di November

ORANJESTAD (AAN): Recientemente, Minister di Enseñansa y Deporte Endy Croes a reuni cu Directiva Baseball Clasico Aruba 40+, esta Sr. Jimmy Werleman, Señora Somaly Chundro y Señora Sulayka Thode-Dorothal. Directiva Baseball Clasico Aruba 40+ ta organizando un torneo internacional Kingdom Classic Baseball 40+, cual lo tuma luga aki na Aruba di 1 di november pa 5 di november proximo.

   Durante e reunion a dialoga tocante e evento deportivo aki y a pidi contribucion di Gobierno di Aruba pa por haci e torneo aki exitoso. Despues cu Baseball Clasico Aruba 40+ a termina y a conoce un campeon, ta preparando pa Kingdom Classic Baseball 40+.

   Minister Endy Croes ta habri pa scucha y contribui den e desaroyo di deporte. Finalmente, e mandatario di Deporte ta desea Directiva Baseball Clasico Aruba 40+ hopi exito cu e torneo. Cu deseo, disciplina, dedicacion y determinacion ta logra.