Directora Tecnico di COA ta splica e importancia di strategia na nivel di maneho di deporte

ORANJESTAD (AAN): E asina yama “Capacity Building Training Fase II” a sigui cu tayer di Planificacion Deportivo

   Esaki tabata Dialuna anochi na MFA Noord, y na final di e parti di “Marketing & Communications” a pasa pa Planificacion Strategico Deportivo, unda Directora Tecnico di COA Monica Fajardo a prepara un tayer interactivo pa tur federacion miembro presente.

   Durante e prome dia di tayer, a splica e importancia di tin un planificacion strategico na nivel deportivo y ki tools por usa pa analisa e necesidadnan di cada federacion.

   Manera costumber a mira un bon participacion di tur federacion miembro presente, unda a traha riba diferente ehercicio cu duna un idea concreto pa con traha na yega na un Planificacion Strategico Deportivo individualisa pa cada federacion. E tayer aki sigur lo sirbi den e proceso di cada federacion como e obhetivo final di fase II ta pa prepara un plan strategico general pa trece mehoracion na e nivel di maneho.