ORANJESTAD (AAN): Diaranson anochi na YMCA San Nicolas a tuma lugar un anochi informativo organisa door di Aruba Basketball Bond (ABB)
pa mayornan y atletanan di Seleccion U15 di Basketball cu lo ta biahando otro siman pa Sint Maarten pa e “Paradise Showdown”. Na e anochi informativo aki Presidente di Aruba Basektball Bond Sra. Jenneve James-Russell y Sr. Patrick Werleman di Comite Olimpico Arubano (COA) a reparti contrato y tambe un “Code of Conduct” na cada hungado y mayornan. Tur cos den e contracto ta conforme cu exigencia di Bon Gobernansa y tambe ley Arubano.
Tur hungado a bay di acuerdo cu e contrato y e Code of Conduct y hunto cu nan mayornan y directiva di Aruba Basketball Bond a firma esakinan bou supervision di Comite Olimpico Arubano. Ta bon pa menciona cu e entrenador y entrenador asistente tambe a firma nan debido contrato y Code of Conduct.
Un total di 11 pais cu ta forma 8 ekipo ta competi den e torneo aki. E islanan competiendo ta: Aruba - Curacao - BES eilanden - St Kitts - Grenada - Anguilla - Sint Maarten Dutch side y French St Martin cu ta forma un team hunto cu St Barths. ABB ta orguyoso cu e logro importante aki y ta desea nan atletanan tur clase di exito na Sint Maarten durante 4-8 di october venidero.
ABB ta gradici Sr Patrick Werleman pa su participacion na e anochi importante aki, unda el a duna splicacion di e importancia huridico di e contracto y Code of Conduct. Ta importante pa remarca cu COA ta aplaudi e iniciativa aki di ABB, como ta mustra un compromiso di parti di e federacion pa inclui aspectonan di bon gobernansa den nan maneho y operacion.
https://diario.aw/categories/noticia/deporte/aruba-basketball-bond-cu-un-tremendo-iniciativa-den-cuadro-di-bon-gobernansa#sigProId280bd8d83b