Atleta Olimpico Chloë Farro ta rumbo pa Spaña pa su educacion y entrenamento

Ta busca pa sigui eleva su mes den tur aspecto como atleta y  hoben profesional

ORANJESTAD (AAN): Recien a reuni cu atleta Olimpico di landamento Chloë Farro, unda cu hunto cu Directora Tecnico Monica Fajardo y Secretaria General Nicole Hoevertsz a combersa riba su plannan pa 2025-2026. Durante e reunion ameno aki Chloë a indica di bay pa Barcelona-Spaña, unda e lo bay pa obtene Masters Degree den “Financial Technology and Business Analytics” na e universidad di EADA Barcelona.

   Banda di su ambicion academico, Chloë lo sigui entrena pa e Ciclo Olimpico aki, unda cu despues di un bon prestacion na Weganan Panamericano Junior ASU2025, e lo sigui entrena pa e siguiente weganan den 2026. Chloë lo entrena un club profesional di landamento na Barcelona cu ta conoci pa entrena otro atletanan di nivel Olimpico, unda e lo prepara su mes debidamente pa asina sigui mehora como atleta di landamento.

   Comite Olimpico Arubano ta contento pa mira un hoben manera Chloë cu tin e disciplina pa kier sigui entrena na un nivel di alto rendimento y alavez sigui su estudio como hoben profesional. COA ta desea Chloë tur tipo di exito den e reto aki.