Diabierna a keda lanza e weganan escolar “WE Aruba”

ORANJESTAD (AAN) -- Diabierna cu a pasa, na J.F. Kennedy Education Center, a keda oficialmente lanza e “WE Aruba”, cu ta nifica Weganan Escolar 2022, cu participacion total di IBiSA pa tur scol.

Minister di Enseñanza y Deporte Endy Croes a duna informacion al respecto. E mandatario a expresa, na prome lugar, cu e ta spera cu scolnan pone esaki riba nan facebook, tambe Inspeccion di Enseñanza, pa tur hende compronde kico ta “WE”.

E minister a bisa cu algo importante ta e premio envolvi pa e scolnan. Esaki ta basa riba un concepto pa esnan cu a competi henter e aña, IBiSA ta atende cu esaki, y apart e muchanan lo haya nan medaya.

Pa e scol cu ta competi den tur ocho deporte ta esun cu ta score mas halto, y scolnan cu ta bay cu un  of dos deporte, logicamente ta bay mas abao.E dignatario a expresa cu esaki ta hustamente pa crea motivacion den tur scol, pa purba pa otro aña tin mas deporte posible competi contra otro.

E ta un motivacion tambe pa scol pa e placa aki bay pa drecha algo na scol. El a agrega cu e ta bay laga scolnan duna input pa premira kico e premionan ta bay ta e otro aña.

Pero e scol cu a sacrifica desde Januari y tur e siguiente lunanan aki, despues di oranan di scol y hunto cu e docentenan, y IBiSA cu a dirigi esaki, ta bay tin nan recompensa na final, na momento cu esun cu sali ganador di e competencia “WE Aruba”.

E mandatario a agrega cu otro siman lo tin na Aruba e delegacionnan di Curacao y Bonaire, hunto cu IBiSA, cu lo lidera esaki, y e minister lo reuni cu nan pa wak un posible restableciento di e Weganan Interinsular. Tambe ta bay busca e formula pa acopla algun di nan, pa bin  cu un wega escolar final.

Croes a splica cu lo cual el a bisa prome ta confirma y e ultimonan aki ta “in the meeting”. Ora e tabata na Hulanda na Maart, hunto cu Minister di Deporte di Curaçao, den conversacion cu e “Hoofdadviseur” di Minister di Deporte nan a haya sa cu na Hulanda awendia tin e asina yama “Olympic Must” entre scolnan basico, entre 14 diferente deporte, y na Juli nan a celebra un tipo di campeonato pa saca e campeon.

Nan a palabra cu si den futuro, cu miras na 2023 padilanti, por incorpora Aruba y Curacao cu un di e deportenan sea futbol, volley of basket, unda un di nan por bay Hulanda pa competi den e “Olympic Must”, cuminzando kizas na 2023.