Edgard Erasmus: “Deporte ta un vehiculo cu por yuda e mucha den su desaroyo”  

IBiSA ta hopi contento di por hunga un rol den WE Aruba:

ORANJESTAD (AAN) – Durante e lanzamento di “WE Aruba”, señor Edgard Erasmus, di parti di IBiSA, a expresa cu e Instituto ta hopi contento di por hunga un rol den esaki. El a indica cu for di inicio di Januari nan a cuminza traha riba e proyecto aki.

Erasmus a splica cu e proyecto aki ta dirigi na scolnan preparatorio, basico y secundario, den cual tur alumno ta bay haya chens di participa den tur tipo di deporte, locual IBiSA ta kere cu ta hopi importante, pasobra deporte ta e vehiculo, cu por yuda e mucha den su desaroyo tambe. El a agrega cu ya tin weganan andando caba na unda scolnan ta bay clasifica, y lo hunga e finalnan den e WE Aruba. Tin cierto deportenan cu a scoge pa esaki, y sr. Erasmus a expresa cu esaki ta bay bira algo hopi bunita tambe.

Erasmus a subraya cu deporte ta genera un balor importante pa e muchanan y esaki sigur mester sigui apoya y motiva na nivel escolar, pa e sigui crece.

E idea ta pa e concepto di WE sigui crece y brinda oportunidad na tur alumno di scol pa participa den deporte. Finalmente, señor Edgard Erasmus a gradici tur scolnan, pasobra sin nan e WE aki no por ta posible; e docentenan cu ta stimula y motiva e muchanan pa cu deporte despues di scol, y e esfuerzo di e docente y mayornan, tur stakeholders, IBiSA cu ta e parti organizatorio, y FST pa e acomodacionnan. Tin hopi aspecto di preparacion cu tin cu sosode pa por organiza un proyecto asina grandi.