Compania ‘Hey Dude’ ta patrocina delegacion di Comite Olimpico Arubano pa Weganan Panamericano

ORANJESTAD (AAN): E siman aki, a haya sa cu e compania “Hey Dude” ta patrocina delegacion di Comite Olimpico Arubano pa ASU2025. 

Di e forma ey nan ta brindando apoyo pa nos atletanan local cu sapatonan comodo y di calidad.

   Cu algun dia faltando pa inicio di e Weganan Panamericano Junior ASU2025, e delegacion di #TEAMARU ta den e preparacionnan final pa embarca rumbo Asuncion-Paraguay. Un parti importante di e proceso aki ta percura cu e delegacion ta bon uniforma pa asina ta comodo y por representa cu orguyo nos pais a traves di un uniform unico cu ta ilustra e beyesa di Aruba.

   Un piesa clave pa por duna e uniform un “look” impresionante, ta un bon par di sapato, cu no solamente ta complementa e uniformnan “Fauna” cu a ser estrena durante e Weganan Olimpico di Paris2024, pero tambe pa brinda e sosten y comodidad necesario pa e dianan largo na e Weganan. Aki e compania “Hey Dude” cu ta un marca mundialmente reconoci cu awor a habri nan “franchise store” na Aruba, y a tuma contacto cu COA cu e deseo di kier patrocina sapato pa ful e delegacion.

   E sapatonan di Hey Dude ta conoci pa ta duradero, hopi comodo y hopi facil pa bisti henter dia, como nan ta sapato hopi “light”. Esaki ta un adicion tremendo pa asina por completa e uniform di #TEAMARU cu lo wordo usa tur dia na ASU2025.

   COA ta gradici e propietario di Hey Dude Sr. Ravee Boolchand pa e patrocinio y kier aporta na nos atletanan local cu lo briya riba escenario internacional den algun dia. Cu apoyo di nos mercado local, nos ta logra haci mucho mas pa nos atletanan y desaroya e mundo deportivo na Aruba.