Aruba ta cla pa anfitrion di competencia CONCACAF Boys U15 Championship

ORANJESTAD (AAN): Manera ta conoci, for di Dialuna 4 di Augustus te cu Diadomingo 10 di Augustus 2025,

Aruba lo ta ricibiendo delegacion di 16 pais pa aki competi den un torneo internacional di futbol hubenil.

   Minister Gerlien Croes, hunto cu Arubaanse Voetbal Bond y comunidad ta cla pa duna apoyo total na nos futbolistanan.

   Durante un conferencia di prensa convoca pa AVB, nan hunto cu Minister Gerlien Croes a enfatiza cu esaki ta un torneo grandi.  Corda con aña pasa Aruba tabata anfitrion di e campeonato di CONCACAF Girls U15 y e aña aki atrobe e isla a haya e honor y confiansa di CONCACAF pa ta anfitrion di un otro gran torneo di futbol e biaha aki den e categoria mucha homber.

   E weganan lo tuma lugar na Stadion Guillermo Prospero Trinidad na Dakota, y Stadion Buchi Panama Wever na Yara.

   Aruba tambe ta hungando, y e seleccion di U15 tin coach Dreyer Bracho na cabez, y e ta hopi positivo con e hobennan aki ta preparando pa 2 aña cu yen anticipacion pa e torneo.  E hobennan a desaroya y progresa na forma optimal y como cu tur hungador a cera amistad cerca cu otro, e ambiente ta bon.

    Aruba lo tin algun refuerso cu lo bini di Hulanda y yuda nos e hobennan aki.

   Den e torneo, Aruba ta den un Poule cu pais Jamaica cu ta hopi fuerte, y tambe cu Curaçao.

   Dialuna awo pa 4:00 pm, Aruba lo enfrenta Curaçao pa su prome weg.  CONCACAF lo transmiti e weganan tur e weganan via streaming.