Campeonato Internacional di Bodybuilding Centroamericano y del Caribe ta tuma luga na Aruba na September

ORANJESTAD (AAN): Recientemente, Minister Endy Croes a reuni cu presidente di Aruba Bodybuilding & Powerlifting Association Sr. Giovanni Arends acompaña pa Sr. Glenn Dubero.

         Desde aña pasa a haci un peticion pa september di e aña aki Aruba “host” un campeonato internacional di bodybuilding, Centroamericano y del Caribe.

            Aruba Bodybuilding & Powerlifting Association ta celebrando 50 aniversario e aña aki. Centroamericano y del Caribe lo tuma luga e aña aki na Aruba, entre 21 pa 25 di september, unda cu alrededor di 38 pais y 450 atleta lo ta compitiendo.

            Sr. Arends a presenta nan plan final na e comision di Ministerio di Deporte, cual lo percura pa duna sosten substancial pa organisa e campeonato aki na Aruba.

            Minister Endy Croes ta indica cu e evento internacional aki na Aruba ta cumpli cu vision di Gabinete Wever-Croes II, mirando cu mei y september ta e lunanan mas abou den turismo y e evento aki lo trece mas di 600 bishitante na Aruba den e luna di september.

            Pues, ademas di aporta na e desaroyo di deporte Pais Aruba, ta contribui na e desaroyo di nos turismo.

            Minister Endy Croes y Sr. Arends ta keda den comunicacion estrecho cu otro pa organisa Centroamericano y del Caribe exitosamente. Cu disciplina, deseo, dedicacion y determinacion ta logra meta.