ORANJESTAD (AAN): Diabierna awo, ta tuma luga e apertura tan spera di Weganan Escolar 2023.
Cuminsando cinc’or di atardi cu e “warm up jam” dilanti Compleho Deportivo Frans Figaroa na Noord cu dj, brassband hunto cu e mascota Wiwi saludando nos muchanan. Pa 6’or di atardi lo inicia e ceremonia oficial cu desfile di scolnan, baile, show y entrada di e antorcha olimpico. E banda Tsunami lo ta den stadion pa deleita tur esnan presente cu nan tremendo musica y pa pone ambiente total.
Rond di mil alumno di 45 scol preparatorio, scol basico y scol secundario di Aruba ta bay enfrenta otro den un competencia amistoso den shete (7) diferente disciplina, entre otro, badminton, functional fitness, volleyball, basketball, futbol, beach tennis y baile deportivo. Minister Endy Croes ta invita henter pueblo di Aruba pa bin apoya nos mucha- y hobennan den nan deporte escolar.
