Body Boarder hoben Lendon Albus a logra cay den premio na Panama

ORANJESTAD (AAN): Recientemente a sali pa Panama, un delegación representando Aruba Body Board Association “ABA”,

pa asina representa Aruba na e prestigioso competencia Internacional di Bodyboard, “Bocas International Festival Bodyboard Competition” cu a tuma lugar di 4 pa 10 di Maart 2024.

   Pa Aruba, e atleta Lendon Albus, di apenas 15 aña di edad a obtene invitación pa participa na dicho competencia.

   E competencia aki a conta cu participación di mas cu 60 atleta Internacional, y 30 atleta di Panama, cu a sa di competi den e deporte di Body Board, na un nivel sumamente halto.

   E atleta Local Lendon Albus, a sa di competi contra e mihornan di mundo, den categoría pro-junioren, incluiendo contra atleta Michael Yancce cu ta e Campeon Mundial di aña 2023.

   Lendon, tabata e único atleta cu a participa cu e edad di solamente 15 aña.

   Asina mes, den tur e bataya fuerte aki, Aruba Body Board Association tin e grato noticia cu nos Atleta Arubiano, Lendon Albus a sa di finalisa na di tercer lugar den Division Junior. Un logro sin igual pa nos dushi isla ARUBA, entre e grandinan mundialmente.

   Aruba Body Board Association  ta felicita atleta Lendon Albus  pa su nan logro como Nr. 3 di mundo.

   Tambe Aruba Body Board Association kier a gradici y felicita su atleta cu a representa Aruba dignamente, sin laga afor e ayudo di gobierno di Aruba por medio Minister Endy Croes, Divi Impact Foundation, Total Aruba, Netflow IT Solutions, Famia Lugo, Rosymar Geerman, Silvhyanne Vrolijk y tur cu di un of otro forma a coopera cu nos atleta.

   Tur esaki posibel danki na esfuerso enorme di Coach Sr. Jeremy Loefstok, y di famia cu a support lo maximo pa haci e competencia aki un exito.