Atletanan di Beach Tennis a regresa Aruba cu varios medaya di oro

ORANJESTAD (AAN): Bon noticia!  Varios atleta cu a participa na Bonaire den competencia di Beach Tennis,

a regresa e isla cu medaya di oro.  Cu esaki esnan di Aruba a demostra nan dominio completo di e deporte aki.

   Teni como parti di Bonaire International Sports Week, e torneo a mira con Aruba a sobresali principalmente den e Advanced Men, Advanced Women, y tambe divisionnan di Open Women.

   Den e top categoria di Open Women, (wega di top nivel), Maria Buuts y Eugemine Ignacio di Aruba a domina e competencia, ganando medayanan di oro cu nan fabuloso prestacion durante un wega hopi preta contra Farah Mesbahi y Inge Vos di Bonaire.   Den e categoria Advanced Men, Anderson Giel y Amaro Maduro a demostra nan determinacion y habilidadnan excepcional pa bay cu e victoria.  E division di Advanced Women a bira un final di atletanan Arubiano so, unda Jenna El Oualkadi y Rixt Kramer a sali como ganador, mientras cu Yentl Lieuw y Jacomien Aleman di Aruba a sali na di dos lugar, y asina Aruba a domina e ABC Cup aki.

   E torneo anual ta duna un bon indicacion tambe di e nivel creciente di Beach Tennis riba e islanan individual, y e resultado aki tabata visible den categoria Open Men, cu un final di atletanan di Bonaire.

   E competencia di ABC Beach Tennis Cup tabata un chens unico pa hungadornan di islanan bisiña a yega hunto pa goza di e deporte y conecta cu otro.