ORANJESTAD (AAN): E muchanan di talentoso di Aruba Soccer Academy (ASA Elite Team) ta preparando pa bay competi den exterior.
Pa haci esaki posible, nan ta preparando un Torneo 4x4 special pa nan por recauda fondo.
Esaki lo bay na final di otro luna, y ta den e “Dia di Rey Tournament”, y e ta algo special pa funraising, pa apoya e muchanan pa nan por bay participa den e “Miami Soccer Cup 2024” for di 6 te cu 13 di Juli 2024.
Torneo mes di ASA Elite Team lo ta Diasabra 27 di April 2024, y e lo ta den Compleho Deportivo Franklyn Bareño na Piedra Plat. E lo bay ta for di 8:00 am te cu 1:00 pm.
E asina yama “4x4 Soccer Tournament” aki lo bay ta pa diferente categoria, esta teanan di edad 4 pa 6, tambe edad 7 pa 9, edad 10 pa 12, y edad 13 pa 15.
A ser splica na DIARIO, cu tur mucha ta bon bini pa participa, sea nan tin experiencia of no, sea mucha muher of mucha homber. Djis forma bo team di 4 hungador y ban apoya deporte. Lo cobra djis 25 Florin pa mucha participa.
Pa adultonan, lo tin for di 4:00 pm te cu 10:00 pm, un Kickball Tournament tambe. E actividad aki ta pa recauda fondo pa e team por viaha. Pues ningun club of academia lo haya e ganashi.
