Atleta Wendel Beyde a wordo honra den cuadro di e programa di Paseo Herencia “Gift of Sports”

Valeria Pietersz y Jandella Orman:

ORANJESTAD (AAN) E Gerente General di Paseo Herencia, Valerie Pietersz-Camacho, den presencia di Janella Orman, Coordinadora di Mercadeo, durante un conferencia di prensa nan a splica cu nan ta honra otro atleta, den cuadro di nan programa “Gift of Sports”.

   E biaha aki, e premio a wordo otorga na e atleta Wendel Beyde, den presencia di su mayor Anecy Toussaint.

   Valerie Pieters a bisa cu Paseo Herencia, for di principio, semper a aporta na deporte di Aruba door di reconoce nos talentonan hoben, y for di aña pasa a cuminza cu e programa “Gift of Sports”, na unda nan kier ta parti di e carera y proceso di nos atletanan hoben door di yuda nan y contribui financieramente, na e metanan deportivo cu nan tin, na unda cu Paseo Herencia ta duna bek y yuda nos atletanan local logra cosnan grandi pa nan mes, na Aruba, y cu despues nan por ta orguyoso di por tin nan riba nan World of Price Stars.

“Nos ta hopi contento di por comparti cu boso nos di dos atleta cu ta bay forma parti di nos Gift of Sports, y pa bosonan tambe conoce e atleta un tiki mas di cerca y sa cu e ta forma parti di e programa aki, cu nos ta hopi orguyoso cu e ta forma parti di dje”, Valerie a bisa.

Seguidamente, Janella Orman a referi na e proceso, cual a habri na Juni pa aplicacion.

“Nos a haci invitacion pa cada atleta di 12 aña bay ariba, p’asina nan manda nan CV deportivo y tambe un video di introduccion p’asina nos evalua ken ta bin na remarca pa esaki. Nos a haya hopi aplicacion, nos ta hopi orguyoso di cada un atleta cu a entrega nan video creativo y tambe nan CV deportivo, y hunto cu e comite nos a yega na e atleta aki cual a impresiona nos hopi su video y tambe su CV largo di su logronan local y internacionOrmanal, y su dedicacion y plan pa futuro tambe a impresiona nos, di Paseo Herencia, y pa nos ta un orguyo di anuncia cu e atleta aki, ta Wendel Beyde, cu ta un atleta cu ta enfoca mas den distancianan largo. Nos ta orguyoso di loke el a logra caba y nos tin confianza cu, hunto cu nos support, e lo logra mas pa Aruba, y lo trece mas orguyo pa nos Isla”, Janella Orman a expresa.