Aruba Open Beach Tennis 2025 lo bay impone un norma mundial nobo

Ocho dia di festival di deporte cu musica y cultura mas grandi den Caribe

ORANJESTAD (AAN): E asina yama ‘Aruba Open Beach Tennis Championships 2025’ ta yegando cerca pa dianan 9 te cu 16 di November 2025 na beach di Bushiri.

   E edicion di e aña aki ta hisa e nivel un biaha mas, cu un premio record di $125.000, cu ta e premio di mas halto riba calender mundial di ITF Beach Tennis, y lo ta ademas e prome biaha cu Aruba ta anfitrion di un ITF Sand Series 100 event, e clasificacion di mas halto.  E etapa aki no ta djis reforza e puesto di Aruba como un poder global pa beach tennis, pero tambe ta pusha e reputacion di e isla como un top destinacion pa turismo deportivo.  Cu e sosten grandi di Aruba Tourism Authority, nan ta sigui logra etapanan nobo, cu ta stimula tanto e crecimento mundial di beach tennis y e vision amplio di Aruba pa turismo sostenibel.

   Aña 2025 ta marca tambe un momento historico pa e deporte aki: E ta bira e prome biaha cu ITF ta inclui oficialmente e Mixed Doubles den su sistema di clasificacion mundial.  Aruba Open 2025 lo tin e prome edicion di torneo Mixed Doubles como un evento sanciona pa ITF, y pa haci esaki aun mas emocionante, e premio cash aki a subi cu $10.000.

   Cumpliendo cu e mision di e organizacionnan di Aruba Open pa eleva e experiencia di evento, e biaha aki lo introduci diferente avance digital y tambe na e lugar mes.  Nan lo tin un App di evento cu ta integra, y lo bay ta e fuente principal pa tur loke ta pasando na Aruba Open, incluyendo update bibo, notificacion instantaneo, y resultado den tempo real.

   Ademas di e competencianan, e Aruba Open Village ta bay ta mas grandi cu nunca, y lo bay tin como 10 bendedor di cuminda cu ta ofreciendo un mezcla di cuminda internacional y local, cu lo bay complace gusto di tur hende presente.

   Lo bay tin musica tocando bibo tur anochi, cu actuacion di e mihor artista, bandanan musical, y DJ di Aruba, cuminzando pa 10:00 pm.  E energia ta bay ta subiendo cada dia durante siman, y culmina den un fin di siman di campeonato sin precedente, y finalizando cu e fiesta final mas epico.

   Aruba Open ta sigui supera limitenan, no djis cu e meta di ta e torneo mas grandi y mihor di ITF Beach Tennis World Tour, pero tambe e festival deportivo definitivo den Caribe y Latino America.

   “E campeonato di Aruba Open Beach Tennis ta demostra con Aruba ta sigui mehorando e calidad di experiencia di e huespednan, mientras cu nan ta celebra e caracter autentico di e isla.  Como organizacion di mercadeo y maneho di destinacion pa Aruba, ta esencial pa nos cu turismo ta beneficia tanto e huespednan como tambe comunidad.  Via di eventonan manera Aruba Open, nos ta mustra mundo nos cultura, hospitalidad, y amor pa deporte na mundo,” ta loke Ronella Croes, CEO di ATA a indica.

   Marc Kiezebrink, kende ta Director di Aruba Open 2025, a indica: “Organiza e prome Sand Series 100 na Aruba, cu e premio mas grandi na mundo, ta un motibo di orguyo pa nos team y pa e isla.  E aña aki ta refleha con hopi Aruba Open a crece, pasando for di un tan stima Torneo local, pa bira awor un cita mundial di circuito.  Nos ta cla pa duna bon bini na hungador- y fanaticonan for di rond mundo na Bushiri Beach.”

   DIARIO a compronde cu ya caba a cuminza bende ticket di entrada.