Hopi satisfecho cu e anochi informativo tocante ‘Athlete365’

Anecy Toussaint, Presidente di Federacion di Atletismo:

ORANJESTAD (AAN): Anecy Toussaint, Presidente di Federacion di Atletismo a duna un resumen di un anochi informativo cu a tuma luga na Universidad di Aruba diahuebs ultimo. Esaki ta un iniciativa di Comite Olimpico Arubano (COA), na unda cu educador Carlos Santiago Oly a comparti informacion di e oportunidadnan cu ‘Athlete365' ta brinda atletanan.

   Athlete365 ta un plataforma global desaroya pa sostene atletanan olimpico, paralimpico y elite bou di e liderazgo di Comite Olimpico Internacional (IOC). E programa ta ofrece informacion, apoyo y oportunidadnan pa desaroyo personal, profesional y deportivo di atleta durante y despues di nan carera.

   Pa medio di Athlete365, atletanan por haña cursonan riba tema manera salud mental, maneho di finansa, preparacion pa bida despues di deporte, y derechonan di atleta. E plataforma tambe ta sirbi como un espacio pa conecta, comparti experencia y promove union den comunidad olimpico. Athlete365 ta enfoca riba bienestar integral di atleta, pa asina nan por keda motiva y sostenibel den nan trayecto deportivo. E mision di Athlete365 ta pa empodera atletanan cu conocimiento y herment pa logra exito no solamente den deporte, pero tambe den nan bida personal y profesional.

   Señora Anecy a remarca cu e informacionnan ricibi tawata un empuhe pa habri wowo y mira e importancia pa federacionnan tin un comision di atleta. El a agrega cu Federacion di Atletismo lo institui un comision di atletannan y pa atletanan.

   Por a tuma nota tambe di presencia di señora Nicole Hoevertsz, secretario general di Comite Olimpico Arubano, cu tambe a hiba palabra e anochi aki.