A.S.U. Olimpiada y Sport & Health Expo ta duna inicio na un temporada nobo pa deporte 

Minister Gerlien Croes:

ORANJESTAD (AAN): – Diadomingo ultimo a duna inicio oficial na un temporada deportivo nobo cu e apertura di A.S.U. Olimpiada, combina cu e vibrante Sport & Health Expo, creando un evento unico caminda deporte y bienestar ta uni na un solo escenario.

Minister di Deporte, mr. Gerlien Croes, tabata presente durante e apertura y desfile oficial, unda un total di 25 federacion y  mas di 100 atleta a marcha hunto, demostrando unidad y compromiso cu deporte y salud na Aruba.

Den su discurso, Minister Gerlien Croes a expresa su gratitud y motivacion:
"Cada comienso ta un trayecto nobo, un oportunidad pa refleha riba nos logronan y traha pa un Aruba mas fuerte. Mi ta desea tur federacion y deportista tur clase di exito den e campeonatonan cu lo tuma luga di awo te cu luna di december."

E evento a marca e principio di un temporada deportivo yen di pasion, determinacion y speransa, resaltando cu deporte y movecion ta un pilar fundamental pa comunidad y bienestar colectivo di Aruba.