AVB Awards Night 2025 celebrando logronan di futbol nacional

ORANJESTAD (AAN):  Minister di Deporte, mr. Gerlien Croes, tabata presente na e espectacular AVB Awards Night 2025,

un evento cu ta dedica pa honra y celebra e talentonan sobresaliente di futbol na Aruba durante e campeonato 2024-2025.

E gala anual, cu a tuma luga na Renaissance Convention Center, tabata yena di emocion, orguyo y gratitud pa tur esnan cu ta traha dia tras dia pa lanta futbol na nos isla na un nivel mas halto. Durante su discurso, Minister Gerlien Croes a expresa su aprecio pa e esfuerzo colectivo di futbolistanan, federacionnan, coachnan y boluntarionan, destacando cu futbol ta mas cu un deporte – e ta un brug di union y speransa pa nos comunidad.

"Nos futbolistanan ta ehempel di disciplina, determinacion y union. Cada wega y cada logro ta mustra cu nos por logra tur cos si nos traha hunto. Futbol ta uni nos pueblo y ta inspira nos hobennan pa persigui nan soño y yega na logronan mas grandi", a ser enfoca durante Minister Gerlien Croes su discurso.

E evento a brinda un plataforma pa reconoce no solamente e talento deportivo, pero tambe e dedicacion di tur stakeholders cu ta contribui na e desaroyo continuo di futbol na Aruba.

Minister Gerlien Croes a conclui cu un palabra di stimulacion, haci un yamada na comunidad y clubnan pa sigui apoya e deporte, pa asina nos por continua na crea oportunidad pa nos yiunan y amplia e impacto positivo cu futbol tin riba nos sociedad.

Pabien na tur nominado, staf y personal di AVB y clubnan.