MEDELLIN: E cantante Dario Gómez, conoci como ‘Rey del Despecho’ di Colombia, a fayece Diamars na Medellin, segun vocero di Clinica Las Americas a indica.
Den e boletin, a mustra cu e dia ey e cantante di musica popular a drenta via Servicio di Emergencia den ‘estado fo’i tino’, despues cu el a colapsa na su cas.
Gómez a drenta sin señal di bida, y a wordo pasa pa un sala unda a practica CPR riba dje, tratando di reanima su curpa, y a haci maniobranan tambe di resucitacion cardiopulmonar sin exito.
Pa 7:31 pm, Docter di Sala di Emergencia a declara su morto. E rey di despecho no tey mas. E palabra ‘despecho’ nifica: resentimento, berguenza, of disgusto cu un hende ta sinti debi na un ofensa of gañamento.
Dario Gómez a nace dia 6 di Februari 1951 na San Jeronimo, y durante su infancia el a pasa ta haciendo trabao den cunucu. Cu siete aña di edad el a drenta scol, despues di tabata traha 2 aña caba cu su tata ta cultiva tereno di agricultura. Pa e motibo ey kizas e no a logra adapta su mes na bukinan di scol y lesnan academico. El a sigui les te cu klas 5 di scol basico.
Su amor pa musica a crece desde cu e tabata hopi chikito. Cu diestres aña el a cuminza canta den algun grupo di cuerda di San Jeronimo, unda el a bira conoci pa su gracia, y e tabata entona perfecto e tono di cancionnan di paranda den e seronan di Antioquia. Cu 16 aña di edad el a cuminza entrega cassette graba di dje mes na negoshinan di Disco na Medellin, y tin biaha e tabata toca nan pa nan, y canta nan en vivo.
Den e epoca ey cu e tabatin 16 aña, e famia di Dario a pasa den un crisis. Su tata a cuminza bira agresivo y a menaza varios biaha di ta bay mata henter e famia, su casa y cinco yiunan.
Dario mes a yega di bisa, cu e maltrato ey contra su mama a dura como un aña y mey. Nos tabata keda asombra pasobra mi tata tabata e mihor casa di mundo. Un anochi ora cu tabata 10 minuut pa 8’or bati, y nos tabata riba cama cla pa bay drumi. Mi tata a yega pa busca problema cu mi mama, y a bin grite cu e lo bay mate. El a dal e como cinco wanta na cara, y despues a manda un solo mokete cu a benta e muher abao. Mientras tanto e tata a sali pafo, a gara un scopet y a mik esaki pa tira y mata e muher. Aki ta unda cu Dario a bula riba su tata, a gara e scopet, y a sali ta core cu e arma pa bay benta esaki pafo den hardin. Dario no tabata sa cu e scopet ya ta gecrank y cu bala den dje. E tabata coriendo cu e scopet cu e cacha dilanti, y e loop patras. Den careda su dede a mishi cu e gai, y aki e scopet a los un tiro, y a mata su tata. El a cay abao y a sangra te muri.
E rumannan di e tata morto a cuminza menaza Dario, y el a hasta pensa pa comete suicidio. Pero su mama a bin anime, y a bise pa bandona pueblo di San Jeronimo, y bay cuminza cu un bida nobo na Medellin. E tabatin 17 aña di edad, y a bay keda cerca su welonan, y a cuminza traha na un compania di papel.
E prome cancion cu a bira conoci den su repertorio tabata ‘Angel Perdido”, cu el a dedica na su ruman muher Rosángela, kende a muri dia 31 di October 1978. E tragedia a bolbe bati na porta di bida di Dario Gómez y a pushe pa varios luna den un tristeza profundo. El a bisa cu Rosángela tabata un di dos mama p’e.
Dario a cuminza traha pa promove su obra na 1979. E tabata viaha di pueblo pa pueblo na Antioquia, tabata bishita barnan y tabata pidi bartendernan pa toca un disco cu e ta cana cune den su tas, y e ta sinta bebe aguardiente of cerbez. E cancion ta ‘Angel Perdido’. Despues el a sali bay, haciendo comosifuera el a lubida e disco LongPlay. E disco ta keda den e Barnan, y asina poco-poco nan ta cuminza toke.
For di 1976, Dario Gómez a saca 25 disco, y asina a bira un di e cantantenan di musica popular mas prolifico di Colombia. Den su carera el a canta cancionnan di Joaquin Sabina y a hasta haci un version di ‘I Will Survive’ di Gloria Gaynor, cu entre su repertorionan ta un di esnan cu tin mas playback riba social media di Spotify (mas di 7 miyon).
No tin un nomber mas conoci entre e cantantenan di Antioquia. Tanto hende di edad y esnan hoben ta reconoce su stem. No tin un cantante cu ta combina mihor cu algun shot di aguardiente.
