Den e ser humano ainda ta un misterio:
ORANJESTAD (AAN) – Algun dia atras, DIARIO a saca un publicacion tocante genetica, y e caractisticanan diverso cu un yiu por hereda di su mayornan. Un tema interesante cu a capta atencion di algun lector.
National Human Genome Institute ta splica tocante “epigenetic” cu ta e estudio di e cambionan heredable den e DNA y “histone” (proteina) cu ta modifica e estructura y condensacion di e chromatin, afectando e expresion genetico y e phenotype. Kiermen, e variabilidad di chromosome y su manifestacion den e individuo.
E revista Nature, a publica un articulo cu ta expone un investigacion realiza pa dos experto di Universidad di Atlanta, Georgia, den cual e pregunta inicial ta si e bida di nos antepasadonan, nan vicio of participacion den guera, lo por tabata tin efectonan claro den e generacionnan siguiente.
Nan a pasa oranan experimentando cu raton y a observa con e miedo asocia na un holo por afecta e animalnan y laga un marca.
A expone ratonnan macho na un kimico di holo dushi cu ta wordo uza pa traha perfume, despues di dal nan un golpi chikito den nan pia. E ratonnan a wordo expone na e proceso aki cinco biaha pa dia durante tres lapso. E resultado ta cu nan a cuminza haya miedo di e kimico (acetophenone) sin haya e golpenan den nan pia mes.
E investigador a permiti cu e ratonnan aki tin sex cu nan parehanan femenino sano, y e producto a resulta specialmente sensible na e kimico menciona, y mescos a sosode cu e siguiente generacion. Pues, e informacion ambiental aki a wordo hereda. Awendia esaki ta conoci como herencia trasgeneracional. E experiencianan traumatico ta keda graba den e DNA y, ora di reproduci, por afecta e sistema nervioso central di e yiunan.
E tema sigur ta controversial y tin contestanan cu a sigui, dilanti tal investigacion. Incluso e mesun revista ta propone cu un di e motibonan cu e escepticismo ta continua, ta pasobra e mecanismo door di cual e herencia aki lo por ta funcional ta ainda un misterio y ta rekeri di un inmersion profundo den e biologia reproductivo pa demostra con e señalnan relevante por forma den e linea germinal.
