ATA contento cu organizacion di Savaneta Seafood Festival

E ta yuda engrandece producto di Aruba

ORANJESTAD(AAN): Aruba Tourism Authority ta contento cu organizacion di e Savaneta Seafood Festival cu ta bay tuma lugar dia 28 di September di 2’or di atardi pa 9’or di anochi.

   Durante un conferencia di prensa Derchlien Dijkhoff  di Aruba Tourism Authority (ATA) a duna esaki di conoce.

El a splica cu ATA tabata contento di tende cu e evento aki lo wordo organiza.

  “Eingelijk e ta un iniciativa di nos tambe, no solamente pa e parti di turismo, sino ta importante tambe pa haci cosnan pa nos hendenan local”.

Na momento cu bo tin algo hopi bon structura y algo bon ehecuta pa nos localnan, dimes e bishitantenan ta bin.

Laga nos cuminsa prome na nos hendenan local, pa nos percura cu nos tin tur cos pa ofrece e bishitantenan.

Esaki segun Dijkhoff, kende a sigui bisa cu ATA ta sumamente contento cu Savaneta ta hopi bon organisa, caminda cu nan ta trece un evento asina grandi, cu ATA ta yama’From the Sea to the Table’,

“Nos kier invita tur habitante di Aruba y nos bishitantenan pa bin dia 28 di September pa disfruta hunto y engrandece Aruba cu su bunita hendenan”, segun Dijkhoff.

El a bisa cu ATA lo sigui traha hunto cu diferente organizacion local pa sigui engrandece e producto di Aruba.