ORANJESTAD (AAN): Diamars mainta, algun persona den Flemmingstraat a bin nota cu tin un auto compacto staciona dilanti un cas,
y di basta rato nan no ta mira e señora tras di stuur ta move. Ora di yega cerca, nan ta ripara cu e persona aki no ta reaccionando.
Banda di 10:00 am, Central di Polis a dirigi patruya di Playa rumbo pa Flemmingstraat 9, cu ta situa net panort di e empresa di Aruba Climate Control, cu ta e caya pariba di Arco Iris Kleuterschool na Playa.
Unidad di Polis cu a yega, a bin topa cu un auto compacti Kia Picanto color blauw cu number A-1075 staciona dilanti e cas. A bin haya e señora adulto mayor cu no tin señal vital mas. Ambulance tambe a yega, pero Paramediconan no por a haci mucho cas, y a indica cu tin di yama Docter.
Algo mas cu mey ora despues, Dr. Texier a presenta y a constata morto di señora Johanna F. Dania, naci na Aruba dia 8 di Februari 1948, pues tin 77 aña di edad. Tin indicacion cu e ta, of tabata biba na Flemmingstraat 9 mes.
Polis no a divulga causa di morto, pero e ta mustra di ta natural. Na final shersh di Aurora Funeral Home a bin busca e restonan mortal di e señora. Na famia di señora Dania, ta bay palabranan di mas profundo condolencia.
