Partido Futuro cu estilo nobo di politica basa riba ‘Responsabilidad Comparti’

Lider Fraccion Futuro, Ruthlyn Lindor

ORANJESTAD (AAN): Un boletin emiti Diabierna mainta door di Ruthlyn Lindor, MSc di Partido Futuro, ta indica cu enberdad el a bira awor e lider di fraccion.  Pues Gino Goeloe no tin e puesto mas.

   Den e boletin, Lindor ta splica cu contrario na loke por ta pasa den otro partido, lider di partido Futuro tin completo confiansa den tur miembro di e Fraccion Futuro den Parlamento y no ta sinti cu e mester micromanage posicionnan.

   “Fraccion Futuro ta kere den un estilo nobo di politica, uno basa riba rotacion di posicionnan y responsabilidad comparti. For di e comienso, nos fraccion a scohe pa haci cosnan diferente: liderazgo no ta exigi of mantene un puesto, sino pa pasa e baston, comparti responsabilidad y mustra cu por hiba politica di un manera diferente.

   Pa e aña parlamentario 2025–2026, e carga di lider di fraccion Futuro lo wordo ocupa pa Ruthlyn Lindor, Master den Criminologia y eerstegraads docent.

   “Cu e siguiente prioridadnan nos ta sigui cu nos trabou: educacion di calidad pa un y tur, oportunidadnan den deporte, musica, arte y STEM, miho cuido medico, promove food security, acceso na un vivienda digno y pagabel pa nos cuidadanonan, mas proteccion, mas seguridad: pa nos hobenan, nos famianan, nos comunidad y un Aruba mas sigur pa un y tur,” el a indica.

   Na mes momento, Fraccion Futuro lo sigui haci su trabou den Parlamento, pa controla gobierno, pa responsabilisa gobierno y pa sigura cu cada decision berdaderamente ta contribui na un miho calidad di bida pa nos pueblo.

   Fraccion Futuro lo sigui sirbi comunidad di Aruba pa un mihor futuro pa nos tur.