Parlamentario Shailiny Tromp-Lee:
- Aunke President Parlamento no a yama reunion pa gobierno duna informacion
ORANJESTAD (AAN): Den un entrevista dilanti di Parlamento cuminsamento di e siman aki, Parlamentario Shailiny Tromp-Lee a splica motibo pa kico den ‘aansprakenlijst’ den IPKO a ancra e proceso pa loke ta trata consensus rijkswet.
Parlamentario Tromp-Lee a enfatisa cu apesar cu Aruba ta hopi agradicido na e yudansa financiero cu Hulanda a brinda Aruba durante e prome aña di e pandemia, te dia di awe ta incomprendibel cu a mara Aruba na condicionnan inhusto.
Tromp-Lee a expresa cu ta parce cu Parlamentarionan di FUTURO y di AVP no kier papia cu e pandemia a exisiti y di e hecho cu algo devastador a tuma luga riba nos isla cu a causa cu Aruba a bin den necesidadnan financiero grandi. Aruba mester a bati na porta di Hulanda pa yudansa financiero. “Ta bon pa pueblo comprende cu Aruba tawata den un situacion di ‘take it or leave it cu a conduci na un consensus forsa durante e prome aña di pandemia”, Parlamentario Tromp-Lee a bisa enfaticamente.
E parlamentario ta splica tocante e condicionnan inhusto di Hulanda, mencionando cu den pleno pandemia, Hulanda a condiciona recorte di 6% den AZV y hasta tawata tin momento cu Hulanda a prohibi Gobierno di Aruba pa comparti documento y informacionnan cu Parlamento di Aruba. A yega na consensus cu esaki en principio no tawata boluntario cu a conduci cu Parlamentonan di Aruba, Corsou y Sint Maarten a atende e situacion indesea y inhusto aki den reunionnan di IPKO.
E discusionnan aki, segun Tromp-Lee, a culmina, cu pa motibo cu no tawata tin claridad y transparencia, tawata necesario pa bin cu un descripcion tocante e proceso cu gobiernonan mester cana pa yega na un consensus rijkswet. Un di e puntonan cu tawata skirbi cla y raspa den e palabracionnan ta, cu na tur momento mester mantene e parlamentonan involucra y informa y na tur momento gobiernonan mester tin e consensus di su parlamento.
“Te e dia di awe, Gobierno di Aruba, pa loke ta trata e consensus rijkswet HOFA no a involucra Parlamento, no a informa Parlamento y tampoco, na ningun momento tin dicho consensus”, Parlamentario Tromp-Lee a enfatisa.
E delegacion di parlamentarionan di Aruba ta sali pa Hulanda diadomingo 21 di september pa atende cu e reunionnan tripartiet y di IPKO. Y apesar di varios intento pa Presidente di Parlamento yama reunion pa trata e consensus rijkswet HOFA prome cu IPKO, no a haci esaki. Pero Rijkswet HOFA lo bira un punto di discusion durante e reunionnan tripartiet y di IPKO e siman nos dilanti.
