Parlamentario Muzannin Wever ta señala:
ORANJESTAD (AAN)— Parlamentario di Fraccion FUTURO, Muzaninn Wever, a trece su punto di bista dilanti, den entrevista cu DIARIO, tocante e tema di Rijkswet.
El a declara cu for di cuminzamento caba FUTURO a para tras di e hecho cu nan ta aproba cu ta bay bin un Rijkswet, pasobra nan ta kere den “toezicht” over di finanzas local, pa wak cu Aruba por yega tambe na un sistema di finanzas duradero y sostenible cu por garantiza un futuro pa henter e pueblo.
“Dus, esey ta nos punto di salida na cuminzamento. Obviamente, aworaki tin un texto oficial, pues un concepto riba mesa cu nos tin cu bay lesa, evalua, discuti riba dje, anto ora cu nos aproba esaki pa nos discutie den Parlamento tambe, pa na final di dia tuma un decision riba dje”, Muzaninn a expresa.
E Parlamentario a señala cu e ta wak hopi discusion eyfo riba dje, cu firmanan ta wordo pidi pa bay contra, mientras cu e no ta un ‘done deal’ manera hopi hende ta pretende cu e ta.
“E tin cu bin Parlamento, y Parlamento di Aruba ta e ultimo cu ta bay tuma un decision riba esaki. Awo, si pueblo kier yama su parlamentarionan ta bisa nan ‘tende mi no ta di acuerdo’ mi ta spera cu nan tambe ta bay lesa e documento, y no djis bay tras di loke politiconan ta bay bisa, pasobra hopi biaha ta bisa un of otro, sin cu nan mes ta informa debidamente, sino cu ta bay tras di e persona cu nan ta kere den dje”, Muzaninn Wever a señala.
Muzaninn ta kere cu ta hopi importante pa pueblo realiza cu e documento concerni, ta un concepto e ta y cu ainda nan tin cu haya conseho di Raad van Advies, cu diferente otro institutonan, unda cu a base di nan parlamento tambe ta hiba e pensamentonan aki den nan evaluacion, anto na final di dia ora e ta yega Parlamento, si nan no ta di acuerdo cu ne, nan ta bisa NO, y e ora ey e no ta pasa!
“Dus, na Parlamento di Aruba tin e palabra final pa esaki. Si nos ta bisa NO ni kico bula cay abao e Rijkswet aki no ta bay pasa!” Parlamentario Muzannin Wever a reitera.
