Speedboat cu 41 kilo di cocaina a sink mey-mey di Venezuela y Aruba

Gran parti di e lote a spula na peninsula di Paraguana

PUNTO FIJO: Biento fuerte cu lama bruto di ultimo dos simannan, por ta e causa cu un Speedboat tipo Go-Fast lo a sink riba e lama mey-mey di Venezuela y Aruba.  Loke nan tin abordo bon seya den bulto ta droga cu ta keda drief, y cu yudanza di biento esaki ta keda move y spula na costa.

   E biaha aki, esaki a socede na oriya di e beach di sector Las Cabañas cu ta pertenece na hurisdiccion di municipio Falcon na Peninsula di Paraguana.

   Y ta durante patruyahe Dialuna di oficialnan di Guardia Nacional Bolivariana (GNB), a bin topa cu bulto, y tambe algun cu a kibra y pakinan los di droga a drief y pega riba beach.

   Despues di a documenta cada uno cu a spula na tera, a trece nan hunto.  E total a bira 36 paki yena cu cocaina, y nan ta identifica cu seyo riba nan, algun cu inicial LG, y otronan cu e nomber di Toyota.  Un di e pakinan aki a pisa 1.138 gram, pues e cargamento aki cu a spula na tera a yega na un peso total di 40.968 gram, pues 41 kilo.

   President Nicolas Maduro a ordena aña pasa pa instala “basenan militar” na e Peninsula di Paraguana pa combati narcotrafico den e zona, pasobra e ta un di e rutanan cu narcotraficantenan Colombiano ta tuma rumbo pa Europa, como cu esaki ta apenas algun kilometer leu di e islanan di Aruba, Bonaire, y Curaçao.

   E biaha aki, autoridadnan ta sospecha cu e droga a bin di un Speedboat cu a sink mientras e ta nabega entre e costanan di Peninsula di Paraguana y Aruba.  Si ta asina, y basa riba otro casonan similar, por mira cu ta hopi droga ta wordo laga atras y ta spula na beach.

   Ministerio Publico a wordo informa di loke nan a haya, y a tuma over e investigacion pa cu esaki.