ORANJESTAD (AAN): Diadomingo atardi banda di 4:45 pm, a presenta dos ciudadano na Warda di Polis na San Nicolas.
Uno di nan a declara cu nan ta criador di bestia, y awor nan tin Security Video Camera cu ta graba di dia y anochi, pues 24/7, y siman pasa el a mira riba Camera, con dos hoben a horta su cabritonan.
E Cameranan aki ta sofistica y di high-resolution. Pasobra riba imagen graba por a mira e color, marca, modelo, y hasta e plachi di number di e auto den cual e dos hobennan aki tabata core rond.
E auto aki ta un Toyota Tercel color berde. E ciudadano a bisa cu el a reconoce e hobennan tambe riba e video. E mesun dia e no a yama Polis, pasobra e mes a bay na e adres di e hobennan aki pa asina purba regla e asunto pa e haya su cabritonan bek.
El a papia cu e tata di e hobennan pa yega na un acuerdo riba su cabritonan horta
E motibo cu e a bin Polis, ta cu un rato prome e Diadomingo atardi ey, el a wordo menaza cu un arma di candela banda di ex-Huliba Bar den Weg Fontein.
El a bisa Polis, cu un di e hobennan cu a horta su cabrito, tambe a dirigi un arma color di plata den su direccion, y e arma aki ta parce un revolver.
Mientras tanto yamada a drenta na Central di Polis tambe encuanto e hobennan aki coriendo den un Toyota Tercel berde cu arma den Weg Fontein.
Tur dos unidad di Polis cu tabata riba caya, a mobilisa rumbo pa Weg Fontein y a bay den area di ex-Huliba Bar. Yegando eynan cerca di e edificio di Huliba Bar, e agentenan a mira e Tercel berde cu ta staciona eynan. Tambe a mira dos hoben sinta riba stupi di e edificio. Un di e hobennan ta lomba sunu, cu un postura fuerte, cu color di cuero bruin. E otro hoben tin un camisa blauw y tin postura delega, cu color di cuero bruin.
Ora cu e hobennan aki a mira Polis yega, tur dos a bira cobarde y a rek careda sali bay direccion panort. Polisnan tambe den nan unidad a bay nan tras, y via nan speaker a ordena e hobennan pa nan stop di core. Aki ta unda e hoben delega a stop di core.
Pero esun cu ta lomba sunu a sigui core direccion panort. E tabatin un schoudertas preto cune, y e tabata keda tene esaki cu su man durante di ta rek e careda. Despues el a bira y drenta pida mondi bay direccion pariba y a desaparece.
E otro hoben a wordo deteni na forma tactico. E tambe tabatin un schoudertas preto den su poder. Den e control di tas, a bin haya un grinder di marihuana y dos sakito di plastico transparente conteniendo marihuana.
Den e Toyota Tercel berde, a bin haya riba asiento di pasahero dilanti un arma di airsoft gun, y riba e dashboard un baki di metal conteniendo algun bala di kelki.
Polis a detene e hoben di inicial M. como sospechoso di viola Articulo 2:255 (menaza cu morto), y Articulo 4 di Ley di Droga, y Articulo 1 di Ley di Arma. Tanto e droga y e arma a wordo confisca pa mas investigacion.
Despues na Warda di Polis, durante control di e arma di Airsoftgun, a bin haya un bala den e loop tambe.
Awor e investigacion riba e caso serio aki ta sigui.
