Dos razzia simultaneo na Noord pa detene 2 persona busca pa husticia

Awor gara pa posesion di arma di candela y droga

• Entrada hudicial na un cas na Kamay y tambe na Kurimiauw 

ORANJESTAD (AAN): Oficialnan hudicial pa algun tempo caba ta siguiendo paso di dos individuo, cu a aparece den ‘radar’ di autoridadnan relaciona cu nan movimento den mal caminda.  E dos hombernan aki ta biba den area mas na rand di distrito di Noord, y ta via di diferente investigacion a bin haya sa cu nan lo por ta participando den crimen organiza.

   Pesey mes ta parce cu nan tabata wordo vigila, posiblemente hasta tap nan telefon, pa asina logra haya suficiente prueba pa asina convence Ministerio Publico cu e momento a yega pa aresta nan.

   Esey a culmina ora cu Fiscal a duna OK, y orden di aresto a wordo emiti.  Pesey mes riba Diamars mainta, unidadnan special di Polis a subi riba caya relaciona cu e investigacion andando.  Di e forma ey, un team di special di Polis yama “Team Bijzonder Project” (TBP) cu refuerzo di Team di Aresto a tene un razzia na un cas na Kamay, y na un otro cas mas pariba na Kurimiauw.

   Vocero di Polis, Lito Lacle, a confirma na prensa cu autoridad a yega di sorpresa na e cas na Kamay, pues ningun hende por a huy.  Na e cas aki a bin haya cargamento di droga, y a logra detene e homber cu nan tabata busca, esta J.P.E. di 23 aña di edad naci na Aruba.

   Un otro unidad di Polisnan hunto cu Team di Aresto a presenta di sorpresa tambe poco mas pariba di Kamay, na e cas na Kurimiauw y aki a detene e otro un hende homber di inicialnan G.D.S. di 40 aña naci na Aruba.

   Lacle a confirma cu den e Entradanan Hudicial aki, nan a haci uso di Team di Aresto pa por a detene e sospechosonan. Tambe a haci uso di e unidad di K9.

   E sospechosonan a worde entrega na Unit Narcotica cu lo sigui cu e investigacion.

   Pa Cuerpo Policial por resolve mas caso cu cooperacion di e pueblo di Aruba. Esaki ta hopi importante pesey nan ta pidi si bo tin cualkier informacion yama e tipline: 111-41.  Nan ta garantiza cu bo ta keda anonimo.