Persecusion riba lama a finaliza den Go-Fast tur na candela

Update di e caso

ORANJESTAD (AAN): E siman aki, DIARIO a ricibi un update mas riba e persecusion cu a socede siman pasa den area cerca di isla di Bonaire, ora cu e barco Zr.Ms. Groningen y tambe Wardacosta di Caribe Hulandes a logra di intercepta cargamento di droga cu tabata cruzando Lama Caribe.

   E barco di marina hulandes, Zr.Ms. Groningen a yuda den e caso aki cu a socede Diahuebs mainta.  Esaki a yuda nan confisca un total di 600 kilo di cocaina.

   Radar Maritimo a detecta e boto sospechoso aki, via di Centro di Operacion Maritimo (MOC).  Mesora nan a manda Zr.Ms. Groningen den e direccion, y tambe a laga e avion Dash-8 di Wardacosta lanta vuelo pa bay vigila e boto.

   E barco Zr.Ms. Groningen a baha dos boto specializa di tipo FRISC, pa asina nan yega aun mas rapido riba e boto sospechoso.  Ora di yega cerca, a bin nota cu ta trata aki di un speedboat tipo GoFast cu ta moviendo hopi rapido.  Autoridad tambe a bay su tras y yega cerca.  E persecusion a dura bastante, y aunke a duna nan señal pa stop, nan a sigui core bay.

   Aki ta unda a cuminza los tiro di advertencia riba nan, pero asina mes a sigui core.  Despues un sniper na un forma profesional a los tiro y a destrui tur tres Outboard Engine di e GoFast.  Asina finalmente a logra pone nan stop forzosamente.  Tur miembro di tripulante a hisa man den halto y entrega nan mes.

   Ora cu e botonan di FRISC tabata yegando cerca, e tripulantenan abordo di e GoFast a cuminza tira e bultonan di droga den lama.  Cu yudanza di e avion Dash-8, a yuda guia esnan riba lama na unda e bultonan aki tabata drief, y di e forma ey a logra di saca un total di 20 bulto for di lama.

   Den e GoFast tabatin cinco persona, di cual cuatro ta Venezolano y uno ta Colombiano.  Nan a keda deteni.  Tur cinco hunto cu e droga a wordo treci na e isla mas cercano cu tabata Bonaire.  Aki nan a ser entrega na Polis di Bonaire.  E pakinan di droga a wordo pisa, y a yega na 600 kilo di cocaina.  Nan tur a wordo destrui inmediatamente.

   E speedboat tipo GoFast mes, a pega candela y aki por mire tur na vlam riba lama cerca di Bonaire.