Fecha di pago a pasa fin di Juni...
ORANJESTAD (AAN): Manera DIARIO a ripiti na varios ocasion, e deadline pa tur automobilista tin e di 2ndo mitar di plachi di number paga, of tambe henter aña cerca DIMP, tabata Diabierna 30 di Juni 2023.
DIMP a hasta ofrece desde aña pasa un proceso automatico, unda bo ta paga e prome mitar den quota poco-poco di 50 Florin pa luna, pa asina ora e deadline yega, ya bo a paga e 150 Florin. Pa lunanan di April, Mei, y Juni tambe a ofrece esaki. Pa bo page poco-poco y ora cu e deadline yega, ya bo tin e segundo mitar paga.
Esnan cu ta keda sin paga: DIMP a divulga recien cu automobilistanan ta fayando hopi pa cu pago di plachi di number. Y si bo no paga na tempo, lo bo haya un boet automatico cu bo tin di paga. E asina yama ‘heffing di boet’ ta wordo poni extra pa nan bay paga.
Y si bo a keda sin paga, tin chens cu bo lo por haya extra boet tambe ora cu Polis garabo riba caminda. Vocero policial Liliana Rasmijn di Cuerpo Policial a splica cu nan tarea ta pa tur dia controla no djis si bo a paga pa bo plachi di number, sino tambe check si bo Aseguro di Auto ta na ordo, como tambe Keuringskaart.
Un automobilista responsable tin di percura cu ora e subi caya cu su vehiculo, e mester tin su documentonan valido prome cu tur cos.
E ta conta pa tur vehiculo, incluyendo Busnan di Paranda, y vehiculonan ATV of UTV cu ta wordo usa den Tour. Si acaso Polis haci un control y descubri cu nan no tin aseguro, hecho ta cu nan ta wordo confisca y hiba cu Takelwagen. Ademas di haya boet, nan lo tin di paga pa e gasto di Takelwagen tambe.
Esey ta conta pa Busnan di Paranda tambe! Percura pa tin papel di aseguro y keuringskaart y full aña paga pa e plachi number. Pasobra si nan garabo ta violando reglanan aki, imaginabo cu tur hende den Bus lo tin di bay keda na pia.
Polis no ta bay anuncia ningun plan di control! Nan ta djis controlando caba tur dia riba caya.
