Otro accident na mesun cruzada na Bubali pero sin hende herida

ORANJESTAD (AAN): Diahuebs mainta un accident a keda registra riba Caya Imelda Catharina Eckmeyer-Bermudez, cu ta core for di Boegoeroei bay pa Bubali, na altura di Bubali 50-C.

   Esaki ta un cruzada-T cu ta situa como 230 meter pariba di Bubali Commercial Center.

   Un Delivery Van di VanDorp Kantoormeubelen NV cu tabata coriendo riba Caya Imelda Eckmeyer, a haye sorprendi ora cu na e cruzada ey diripiente un Suzuki Jimny color blauw cu number A-17875 a sali su dilanti y bin dal den dje banda drechi parti patras.

   E impacto a pone e Nissan Urvan blanco cu number A-41056 a bay den un scual y a casi bira bek 180º.

   Aunke tin hopi daño material, e principal informe ta cu ningun chauffeur a resulta herida.  DIARIO a nota cu gerencia di VanDorp Kantoormeubelen a bay te na e lugar pa asina check si nan empleado ta OK, y pa dune asistencia.

   Roadservice di ForenSys a yega pa asina procesa e accident aki pa e proceso via Aseguro cana mas simple.

   Un biaha mas un accident a keda registra na e cruzada-T aki, y ta parce cu como cu e caminda grandi ta curvia net eynan, e lo por ta un reto pa chauffeurnan calcula e velocidad cu vehiculonan ta acercando.