Awor Aruba tin dos K9 Polis profesional cu a ricibi tur training riba e isla

ORANJESTAD (AAN): Tabata e aña aki cu mando policial a mira e importancia cu mester bin cu estudio policial pa K9 polis.

Conhuntamente cu docentenan di Scol di Polis E.J. Watty Vos, instructor di K9 Sr. Vianney Coffie a prepara un estudio profesional riba nivel internacional di K9.

   Cu estudio aki ta habri porta cu Aruba tin su mesun instructor y keurmeester pa por entrena y prepara  cualkier polis cu su K9 local, den region of internacionalmente.

   Despues di seis luna di trabao duro, planifiacion, entrenamento y estudio intensivo di K9, Cuerpo Policial Aruba ta orguyoso di anuncia cu e isla tin dos agente policial cu nan K9 ‘Notorius’ y ‘Dax’ cu a pasa e examen exitosamente y cu ta cla pa subi caya.

   Ta trata aki di agente policial A. Leonard y D. de Castro cu canino Notorius y Dax cu ta di e rasa di Mechelse Herder. Pa prome biaha Polis tin dos canino “dual purpose” cu tin e tarea pa busca obheto y arma di candela. Cu e dos agentenan y canino nobonan aki, e unidad di K9 polis ta sigui crece.

   Na Field di Cobra na Savaneta  a haci entregamento di certificado den presencia di Ministro di Husticia Sr. Rocco Tjon, Comisario Señora Trudy Hassell y Hefe di Scol di Polis E.J. Watty Vos Señora Jeanette Richardson-Baars na e keurmeesters, e dos agente policial A. Leonard y D. de Castro cunan canino Notorius y Dax y tambe a huramenta un colega nobo cu ta J. Lopez Atari.

“Nos ta asina orguyoso di e unidad di K9 polis, mirando e dedicacion, amor profesionalismo y mas aun nan a demonstra cu nan ta domino e tereno aki hopi bon y alavez nan a bin pa keda” Tabata palabranan di Señora Trudy Hassel – comisario di Cuerpo Policial Aruba.

    Coleganan, amigonan y famia por a presencia e demonstracion di e unidad nobo di K9 polis. Aruba por ta orguyoso di tin un team dedica y ta profesionalmente cla pa cualkier eventualidad. Pabien na Sr. Coffie pa su esfuerzo y dedicacion, docentenan di Scol di Polis y e unidad di K9 polis.