Ladron di Pindastraat a comete racha di ladronicia for di auto rond Aruba

Un Diamars cu dolor di cabez pa varios ciudadano

• El a wordo localiza danki na un testigo y un Airtag
• Monton di articulo y computer horta haya na e cas 

ORANJESTAD (AAN): Tabata Diamars anochi, cu entre 8:50 pm y 10:25 pm, Central di Polis a ricibi diferente denuncia tras di otro di kiebronan cometi den auto, y tambe vehiculonan.  Denuncia a drenta for di banda di Neptali Henriquez Park, na Klipstraat, na Werfstraat, y tambe parkinglot di Pizza Hut.  Tur tabata socede tras di otro.  Mas prome, banda di 4:40 pm di atardi, tambe a haya denuncia kiebro y ladronicia for di un auto den Alfred de Mussetstraat.  Un total di 5 kiebro di auto e anochi ey.

   Testigo a yama mesora: Pero e ladron a comete un eror, pasobra un testigo cu tabata banda di Neptali Henriquez Park cerca di Linear Park, a mira con un homber cu color di cuero bruin cla, pelon, estatura largo y hopi delega, cu un barba, tabata usa flashlight pa ilumina den un Jeep.  Despues el a dal y kibra e bentana, pa asina drenta y coba den e vehiculo.

   E testigo a core yama Polis y avisa nan cu e caso aki ta andando.  El a describi e homber pelon tambe cu e ta bisti cu un T-shirt cora of ta biña.  Despues el a sali di e Jeep y a bay drenta den un Nissan March color shinishi, cu tinted windows cu number A-41257.

   Via telefon, e testigo a informa Central di Polis, cu el a dicidi bay tras di e Nissan March di e ladron.  Pero banda di area di Maria Christinastraat cerca di Lagoen el a perde e Nissan March for di bista.

   Apple Airtag a yuda hopi: Despues banda di 9:45 pm, Central di Polis a raporta dos caso di kiebro den auto den Klipstraat.  Uno di nan ta un Apple Macbook cu a wordo horta for di tas di laptop di un Isuzu D-Max.  Loke e ladron no sa, ta cu e doño tabatin un aparato chikito di Apple Airtag poni den e tas.   Y esaki tabata keda transmiti su locacion.  E doño a mustra Polis, cu e Airtag ta raportando cu awor e ta na un cas na Pindastraat na Tarabana.

   Informe a wordo duna, y mesora un patruya a bay core den Pindastraat, y dicho hecho.  Nan a bin topa cu e Nissan March aki para den cura di e cas na Tarabana.  E persona cu tabata coriendo esaki ta e conocido di Polis, esta e homber delega, pelon, y cu barba di inicial A.S.

   Polis a stop e homber, pa asina papia cune. Nan a fula e hood di e Nissan March, y esaki ainda tabata cayente.  For di pafo, Polis a mira claramente cu den e Nissan March tin varios articulo benta.

   Varios articulo horta: Relaciona cu e hecho y circunstancianan, nan a confisca e Nissan March.  Polisnan di Santa Cruz cu tambe a yega, a yuda controla den e cura, y banda pazuid di e cas riba un stul di palo, a bin haya 2 tas.  Uno ta preto cu strepi cora conteniendo un Dell Laptop Computer.  E otro ta un Apple Macbook laptop.  Den e tas Polis a haya e Apple Airtag tambe cu a yuda nan localisa e aparato bek.

   Pues ta bisto cu esakinan ta Computernan cu a wordo horta for di un Isuzu D-Max den parkinglot di Pizza Hut, y un otro cu a wordo horta for di un Isuzu D-Max den Klipstraat.  E articulonan ta poni como 10 meter pabao di e Nissan March.

   A base di tur esaki, e ladron A.S. a wordo deteni pasobra a viola articulonan 2:289 y tambe 2:397, y 2:398 di Codigo Penal.  Ora cu nan a rista e curpa di e detenido, a bin haya un cartera y un smartphone.

   Coleccion di toolbox horta: A bay rista den e Nissan March, y aki a haya varios articulo manera hermentnan den Toolbox special, par di Safety Shoes color mustard, y tambe un Meter di Voltahe riba asiento di pasahero.  Tambe a haya un speaker, y un schoudertas preto cu herment riba asiento patras.

   Polis a ripara cu e plachi di number dilanti ta consisti di un berdadero plachi number, pero un sticker cu otro number pega riba dje.  Na suela banda pabao di e cas, Polis a haya un tas femenino color bruin cla, cu estampado di colebra.  Esaki a wordo reconoci como un tas cu a wordo horta mas trempan na Santa Cruz banda di My Fitness Gym.

   Den cura net na entrada di e cas, tin un auto Nissan Almera blauw, cu no tin tinted windows.  Polis a mira varios toolbox poni den e auto, incluyendo un toolbox cora di marca Milwaukee, y un toolbox geel y preto di marca DeWalt.  Polis a sospecha cu esakinan tambe a wordo horta anochi for di parkinglot dilanti Meteo na Sabana Berde.

   A manda busca team forensico di BFTO pa bay na Pindastraat.

   Na final di anochi, ademas di e Nissan March, nan a confisca tambe e Nissan Almera.  Y tur material cu a wordo haya eynan tambe a keda confisca.  Ohala cu Ministerio Publico salba pueblo di tipo di ladronnan recidivista aki, y exigi castigo pa laga nan ‘stoba’ par di aña den prison.

   Pabien Cuerpo Policial di Aruba cu e fenomenal trabao aki.  Un aplauso pa cada uno cu a haci nan best riba Diamars anochi.