- Ningun clase di atraco a wordo constata
- Fiscal a duna e turistanan un multa pisa
ORANJESTAD (AAN): Manera cu DIARIO a raporta siman pasa, diferente unidad di Polis a mobilisa Diaranson anochi cu urgencia den area di Hotel Zone, specificamente den e area cu tin riba caminda di Irausquin Boulevard, riba e pasiyo largo cu tin dilanti Barcelo Aruba Resort, Hyatt Regency Resort, y Playa Linda Beach Resort.
Banda di 9:15 pm, unidad di Polis di Noord a wordo manda den e area cerca di e parkinglot grandi di Hyatt Regency, como cu eybanda un pareha turista a wordo atraca.
Ora cu Polis a yega eybanda, a resulta cu e ta un tiki mas panort, cerca di e zona di Dunkin’ Donuts net otro banda di Playa Linda Beach Resort. Polis a papia cu e pareha turista procedente di Mexico, y nan a bin cu e storia cu como 90 minuut prome, nan a bira victima di atraco. Esaki ya caba tabata algo raro, pasobra di con ta warda asina hopi pa haci denuncia?
E pareha Mexicano a relata na agentenan policial, cu un rato prome dos homber a atraca nan usando un ijspiek (‘icepick’) cu ta un obheto skerpi pa kibra y separa ijs. Nan a bisa cu un di e hombernan tabata bisti cu flanel blanco y carson preto y tabatin cuero color scur. E otro homber nan no por a wak bon. E hombernan a exigi pa nan duna tur nan pertenencia.
E victimanan a duna Polis un splicacion detaya di tur loke e dos atracadornan a bay cu ne. Nan a bay cu e yabi di nan auto di huur, tambe un cartera conteniendo como $250 Dollar cash, tambe Pesos Mexicano, credit card y tambe debit card, y algun cos mas. Despues di esey, e dos hombernan a huy na pia direccion zuid.
Diferente unidad a keda core rond den Palm Beach y tambe Noord y vecindario pa mira si por topa cu e atracadornan aki. A pone e profesionalnan di Atraco Team tambe, cu a cuminsa cu e investigacion. Aki sigur a bay check grabacion di varios high-definition security camera cu tin tur rond eynan. Esaki fuera cu algun ‘red flags’ mas lo a mustra oficialnan hudicial, cu ningun clase di atraco a socede. Nan a mira cu ningun momento e pareha turista a wordo atraca, y ningun clase di homber a acerca nan.
Cu e pruebanan aki, a keda demostra cu e turistanan di inicial R.J.G.Q. y tambe F.D.P.L.G. a duna un declaracion falso na Polis.
Siguiendo indicacion, Atraco Team a logra recupera e tas, y e turistanan a wordo ordena pa pasa na Warda di Polis. Aki nan a wordo confronta cu e hecho cu nan a duna declaracion falso, como cu tur prueba ta mustra lo contrario.
Oficialnan hudicial a tuma contacto cu Ministerio Publico, y Fiscal a impone un castigo pa e turistanan, den forma di un multa pisa. E turistanan tin di paga e suma aki, prome cu nan bandona Aruba.
Esaki ta demostra cu Departamento di Atraco Team a traha incansablemente pa asina resolve esun aki, y sigur tur otro cu keda registra. Palabra di pabien na nan!
