Liliana Rasmijn, vocero di KPA:
- E no ta algo di djis “fin di siman” so
ORANJESTAD (AAN) Vocero Policial Liliana Rasmijn, a wordo invita di parti di KPA, hunto cu FADA, mirando cu e Fundacion tambe ta wak e importancia di papia tocante e hecho di stuur auto bao influencia di alcohol.
Alto Comisario a papia caba den e dianan aki tocante seis morto caba den trafico, na unda cu consumo di alcohol tambe ta involucra den dje.
Rasmijn a indica cu no solamente Polis ta wak cu tin seis morto den trafico pero nan ta wak tambe diariamente, cu hendenan ta wordo para, controla y polis ta ripara cu nan ta bao influencia di alcohol. Kiermen, awo no ta importa cu ta den fin di siman so, pero el a bira algo di tur dia.
“Y no ta bira algo di anochi, atardi, pero pa 10 or di mainta caba ta haya nos mes cu detencion pa maneha bao di influencia. Pues, esaki ta algo cu nos kier enfoca, nos ta haci hopi di nos banda, mescos cu FADA, nos ta purba concientiza mas cu por, nos ta cuminza for di scol cu mescos cu FADA ta duna charla nos tambe ta dun’e, pa e muchanan sa e consecuencia”, Liliana Rasmijn a relata.
Vocero Policial a remarca cu un hende dal un auto, e por dreche pero un bida no por trec’e bek, y esaki e hendenan mester cuminza compronde: Maneha bao di influencia tin su consecuencianan!
