Chauffeur a perde control y bolter na Koyari

ORANJESTAD (AAN): Tabata den oranan di atardi, cu Central di Polis a manda un unidad di Polis di Noord

riba e caminda di Gasparito pa Koyari, pa un auto cu a bolter.

   Ora cu Polis a yega, nan a bin haya dilanti e cas Koyari #51 un auto compacto Kia Picanto color blauw cu number A-71839 cu a bolter y finalisa gekenter net na entrada di e cura di cas.

   Testigonan a bisa cu e Kia Picanto tabata bin di panort, y el a caba di pasa e cruzada cu ta bay pa Zucchini Restaurant (ex-Buccaneer Restaurant), y aki a perde control banda di cas Gasparito 6.

   El a baha di caminda door di subi acera, bay den scual, ranca par di mata di aloe, y finalisa gekenter dilanti e cura di cas y kibra parti di e cura aki.

   E manehador a resulta levemente herida, pero si a pasa den un tremendo susto. Polis di trafico tambe tabata necesario na e lugar pa tuma tur detaye.