Speedboat tipo Go-Fast a explota y sink cu droga y tripulantenan

Operacion anti-droga a cambia den un accion di buskeda pa naufragonan

• Buskeda cu varios barco y helicopter 

ORANJESTAD (AAN): Un operacion hudicial riba lama pa trata di stop y detene un transporte di contrabando riba Lama Caribe, na final a comberti su mes den un tragedia den oranan di Diamars marduga.

   Un operacion anti-droga di e barco Zr.Ms. Groningen diripiente a cambia, y a bira un accion di buskeda pa tres naufrago cerca di Islanan ABC.  E tres personanan aki tabata abordo di un Speedboat tipo Go-Fast cu a wordo detecta ta nabegando den e area na un forma scondi, sin luz, y moviendo direccion panort.

   Pero awor nan ta perdi, debi cu e Go-Fast aki diripiente a explota y sink.  Di e ora ey, e tres hendenan aki a perde y tabata wordo busca door di unidadnan riba lama, y tambe for di aire, di tanto Wardacosta di Caribe Hulandes, Defensa di Caribe Hulandes, y US Coast Guard.

   Operacion a start: Tur cos a cuminsa ora cu via canalnan internacional, e barco Zr.Ms. Groningen a ricibi un melding cu un avion a detecta un Speedboat Go-Fast cerca di awanan teritorial di Aruba.

   Inmediatamente e barco Zr.Ms. Groningen a baha dos boto tipo FRISC pa bay intercepta e Go-Fast.  Durante e accion aki, e tripulantenan di e FRISC a haya nan obliga tambe pa den defensa, nan tira den direccion di e Go-Fast.  Aki ta unda cu un explosion a socede abordo di e speedboat, y mesora e Go-Fast a cuminsa sink.  Di e momento ey, nan no a mira e tres tripulantenan mas.

   Mesora e barco Zr.Ms. Groningen a cuminsa cu un accion di buskeda di Search and Recue (SAR).  Ademas di e barco aki, den oranan di mainta a haya sosten di e barco Zr.Ms. Pelikaan, un helicopter di US Coast Guard, y un Search and Rescue Helicopter di Wardacosta di Caribe Hulandes, pa hunto a busca e tres personanan perdi.

   E Cutter Jaguar di Wardacosta tambe a tuma over merdia e accion di buskeda for di Zr.Ms. Groningen.  DIARIO a compronde cu Koninklijke Marechaussee a cuminsa cu un investigacion riba e incidente.

   E barco Zr.Ms. Groningen ta e ‘stationschip’ den Caribe Hulandes y ta wordo usa tambe den operacionnan anti-droga.