Un otro hoben tambe a keda deteni
ORANJESTAD (AAN): Tabata den oranan di atardi, cu Central di Polis a ricibi tip cu un auto compacto a yega den caya na e compleho di casnan na Sero Patrishi, y abiertamente ta ofrece y bende droga.
Diferente unidad di Polis a mobiliza, y pa evita cu e auto aki lo por huy, nan a cera ambos banda di caya.
Den e area, a yega y topa cu un Toyota Starlet hatchback color blanco cu number A-75794 para riba acera riba e caminda. Polisnan a baha y a bay atende cu e persona cu ta doño. A resulta cu e ta biba den otro bario, pero a bin Sero Patrishi pa ofrece ‘su mercancia’. Ta comosifuera cu e tin un “servicio a domicilio”.
Polisnan a listra y a bin topa cu substancia di droga. Esaki ta suficiente motibo pa asina e wordo deteni.
Un otro hoben cu tabata pafo ta mira con Polis ta detene e chauffeur, despues di un rato a dicidi na listra su schoudertas tambe. No ta conoci e motibo, pero manera por mira riba e potret, e tambe a keda deteni. Tin indicacion cu e tambe a yega eynan den e Starlet.
Cu vehiculonan di transporte, tanto e chauffeur deteni mas prome, y despues e hoben aki a wordo hiba Warda di Polis. E schoudertas a wordo confisca door di Polis.
