Auto a pasa y a los tiro matando Nayibe Isabel Herrera di 31 aña

Panico den Driemasterstraat

• Drive-by Shooting keto bay bao investigacion
• Posibilidad cu e tiradornan a mata e persona robes 

ORANJESTAD (AAN): Diamars anochi pa mas o menos 10:55 pm, yamadanan a cuminza drenta na Central di Polis, pa notifica cu tin un caso serio di 'drive by shooting' na altura di Bar-a-Bar, cu ta unda antes tabatin United Dinner na Driemasterstraat.  E prome informe a splica na Polis, cu un persona femenino a wordo tira  y e no tabata reaccionando.

   Esaki a pone cu inmediatamente diferente unidad di Polis di Playa a cuminza mobiliza pa eynan, y a pone Centro di Alarma tambe na altura pa core manda Ambulans.

   Na yegada di e prome unidad di Polis, nan a bay check e victima y mesora a sigui pidi ambulance cu maximo urgencia mirando e situacion di e victima.  Mientras tanto Polis a cuminza seya e area di crimen.  Otro unidadnan riba caya, a sigui core rond pa mira si nan por topa cu e auto cu a desaparece.  Testigonan a bisa Polis cu esnan cu a los tiro ta coriendo den un Toyota Yaris color blanco.

   E unidad di Ambulance a yega rapidamente na e lugar, pero ora cu Paramediconan a bay atende e victima, nan a nota cu e persona no ta duna señal vital mas.  E ora nan a pidi Centro di Alarma pa yama un Docter pa bin na e lugar.

   Mientras tanto, oficialnan hudicial di Recherche, y personal hudicial forensico di BFTO tambe a yega eynan.  A yama Bureau Slachtofferhulp pa bin eynan, como cu famianan a bira inconsolabel.

   Finalmente Docter Scholten a yega, y pa 11:55 pm el a constata morto di Nayibe Isabel Herrera naci dia 22 di September 1991 na Aruba, pues tin 31 aña di edad.

   Auto envolvi a wordo haya: Unidadnan di Polis coriendo rond, net na e parkinglot pazuid di e clubhuis di Aruba Juniors den Flaciusstraat a bin topa cu un Toyota Yaris hopi raro para, y ta visiblemente indicando cu el a wordo bandona.

   Inmediatamente Polis a seya e lugar aki, y a pone Recherche na altura.  E lugar unda a haya e Toyota Yaris aki, ta exactamente 490 meter leu for di Bar-a-Bar unda e tiramento a socede.

   For di investigacion cu autoridad a haci, tur cos ta indica cu e Toyota Yaris aki a wordo horta algun rato prome cu e crimen a socede.  Pues esnan den e auto a horta e vehiculo, djis pa pasa pa los tiro dilanti nan contrincante den Driemasterstraat.  Pero ta parce cu awor ta hende robes nan a mata.

   E victima Nayibe Herrera ta wordo describi como un dama hopi cariñoso, cu stima su dos yiunan chikito y su pareha.  Ta parce cu e lo tabata net pafo ey di Bar-a-Bar, na e momento y lugar robes.  Sinembargo Recherche ta sigui cu e investigacion.

   E ta indicacion cu keto bay tin hende cu arma potente ta cana rond riba caya, y cu no tin nocion di e peligro cu nan ta trece pa hende inocente.

   Si acaso abo a mira algo di loke a socede, bo ta ser pidi pa yama Tipline di Polis na 111-41.  Corda cu bo por keda anonimo.

   DIARIO y tambe Cuerpo Policial ta manda palabra di condolencia na famia di e fayecida.