Crimen Pasional a laga dos famia cu dolor profundo

Caso lamentable di Diaranson mainta

• El a choca su pareha na Washington y despues mata su mes na Bushiribana
• Recherche investigando motibo di e tragedia aki entre pareha 

ORANJESTAD (AAN):  Polis a informa cu Diaranson despues di 6’or di mainta central di polis a wordo notifica cu tin un vehiculo Honda CR-V blanco cu number A-29831 para canto di lama net panort di ruina di Bushiribana y banda di dje un hende homber abao na suela cu no tabata dunando señal di bida.

   Pa motibo di e situacion aki a despacha patruya di polis di biaha na e lugar di e sucedido. Na yegada di e patruya, ta constata cu enberdad tin un curpa sin bida como 7 meter pabao di e Honda CR-V.  E vehiculo su porta ta hancho habri, y motor ainda ta cendi.  E curpa di un homber ta eybao cu sanger na curpa y na suela, y den prome bista a mira algun corta na su brasa.

   Inmediatamente a pidi presencia di mas unidad di Polis, pa asina seya e lugar, y a pidi presencia di Docter, autoridad hudicial forensico di BFTO, y Recherche pa yega eynan pa start cu e investigacion. Alabes Bureau Slachtofferhulp tambe a wordo poni na altura.

   Investigacion a continua na unda na prome instante no por a identifica e curpa.  Ora cu a controla e plachi di number, esaki ta registra na un Fisioterapista cu tin adres na bario di Washington.  A pidi un unidad di Polis pa bay na e adres ey na Washington pa check un que otro.

   Sinembargo na e adres na Washington ningun hende ta habri porta, ora cu un conocir mas a yega eynan, a dicidi na kibra e porta pa bay paden.  Asina autoridad a bin topa cu un dama den e cas, kende no tin señal vital, y visiblemente ta mustra cu el a wordo strangula of choca na su garganta.

   Identificacion di victimanan: E caso aki e ora mesora a escala, cu un escena di crimen panort di Bushiribana, y un escena di crimen na e cas na Washington.  Oficialnan di BFTO a haya nan ta bay na e adres ey tambe pa cuminza investiga, hunto cu Recherche.  A seya full e cas, pa asina mantene tur prueba fresco.

   Cu yudanza di mas conocir, a logra identifica e homber morto na costa di Bushiribana.  El a resulta di ta un coach di gym, esta Jose Miguel Garcia Moreno, naci dia 20 April 1988 na Venezuela, pues tin 35 aña di edad.

   E dama cu a ser haya morto na Washington, a wordo identifica como Leila Gregoria Contreras Romero, naci dia 1 Augustus 1974 na Colombia, pues tin 49 aña di edad.

   Recherche ta investigando esaki profundamente, y no ta laga ni un tapadera keto sin bolter esaki otro banda.  Pasobra tin di haya prueba contundente cu ta un drama pasional a socede aki, of si acaso tin otro hende envolvi.

   Tin hopi speculacion cu a sali den medionan relaciona cu e caso aki, pero por bisa cu parce ta trata akinan di un problema entre e pareha cu lo a sali for di man.  Fuentenan cercano ta indica cu e señora ta laga tres yiu atras, esta dos mucha muher y un mucha homber  di matrimonionan anterior. E tabata Fisioterapista trahando na SABA.

   Miguel Garcia Moreno a traha na Aruba como chef na algun restaurant durante e añanan anterior y tambe como 'fitness coach'. Ultimamente, e tabata trahando na Cuts & Curves. E tabata conoci door di su amigonan personal y famia como un persona lief y amabel.  Sinembargo e coach aki tin un carchi di castigo, cu a inclui algun aña cu el a keda encarcela den prison di KIA, pa casonan di stalking y fraude.

   Buscando pa haya sa loke a socede: Miguel cu Leila como pareha, tabata uno cu tin biaha ta mustra di tin hopi amor, y otro biaha tin hopi caso di posible jaloezie.  Parce cu ultimamente, e pareha tabata tin plannan pa casa, pero algo no a bay bon durante e oranan prome loke a finalisa den e tragedia aki.  E caso ta den pleno investigacion y Polis no por a informa ainda cu exactitud ainda kico por a pasa.

    Cuerpo Policial ta haci un suplica na comunidad, specialmente esnan cu e mainta trempan ey lo por a pasa banda di Bushiribana, of esnan cu tabata den area di Washington y por a tende pleitamente, esnan cu sa algo of mira algo pa yama e tipline di polis cu ta 111-41.

   DIARIO y Cuerpo Policial ta manda palabra di condolencia na ambos famia di e fayecidonan.