Alto Comisario hopi satisfecho cu cifranan di criminalidad y ta trahando pa mehora mas ainda

ORANJESTAD (AAN): Den cuadro di celebracion di siman di polis, minister di Husticia y varios miembro di cuerpo policial incluyendo Alto Comisario Ramon Arnhem, tabata na un misa special pa Cuerpo Policial.

Despues di e misa DIARIO a entrevista Alto Comisario Arnhem tocante e dia.

“Ta un dia bunita y un honor grandi cu nos por a bin hunto asina y demostra kico nos por como cuerpo policial y kico nos a logra den e ultimo añanan”.

Esey ta pone cu e momento aki nos ta para keto y ta hopi importante, e hecho cu nos ta uni, segun e Alto Comisario.

El a bisa tambe cu tabata un dia pa corda cu tur agente policial ta uno y cu e mesun meta, cu ta sirbi comunidad.

DIARIO a puntra Arnhem tocante di e cifranan di criminalidad cu minister di Husticia Rocco Tjon a presenta Dialuna y Arnhem a indica cu e ta hopi contento.

“E cifranan ta mustra un bahada na tur e temanan di seguridad cu ta mishi cu comunidad”.

Nos meta ta pa haci e comunidad mas safe y mas mihor pa biba den dje y esey bo por wak den e cifranan, segun e Alto Comisario.

Pa loke ta e metanan di KPA pa e tempo cu ta bin, Arnhem a splica cu mester sigui riba e caminda aki y mehora seguridad pa comunidad mas ainda.

Tambe e intencion ta pa concretiza mas ainda e vision di Cuerpo Policial, como tambe e strategia.

E parti mas importante ta tambe pa e agentenan policial sinti nan mes bon y safe na pia di trabao.

“Hunto nos ta trahando tambe riba un restructuracion”, segun Arnhem.